വന്ദേഭാരത് ട്രെയിന് നേരെ കല്ലേറ്; അഞ്ച് പേര്‍ അറസ്റ്റില്‍

ഛത്തീസ്ഗഡില്‍ ട്രയല്‍ റണ്ണിനിടെ വന്ദേ ഭാരത് എക്സ്പ്രസ് ട്രെയിനിന് നേരെ കല്ലെറിഞ്ഞ സംഭവത്തില്‍ അഞ്ച് പേരെ അറസ്റ്റ് ചെയ്തു. ഛത്തീസ്ഗഡിലെ ദുര്‍ഗില്‍ നിന്ന് ആന്ധ്രാപ്രദേശിലെ വിശാഖപട്ടണത്തേക്ക് നാളെ മുതല്‍ സര്‍വീസ് ആരംഭിക്കാനിരുന്ന വന്ദേഭാരതിലാണ് കല്ലേറുണ്ടായത്. പരിക്കുകളൊന്നും റിപ്പോര്‍ട്ട് ചെയ്തിട്ടില്ലെങ്കിലും ട്രെയിനിന്റെ മൂന്ന് കോച്ചുകളുടെ ജനാലകള്‍ക്ക് കേടുപാടുകള്‍ സംഭവിച്ചിട്ടുണ്ടെന്നും പ്രതികള്‍ക്കെതിരെ റെയില്‍വെ ആക്ട് പ്രകാരം കേസെടുത്തിട്ടുണ്ടെന്നും അധികൃതര്‍ അറിയിച്ചു.

National101 days ago

ഛത്തീസ്ഗഢില്‍ ഇടിമിന്നലേറ്റ് ആറ് കുട്ടികളടക്കം എട്ട് പേര്‍ മരിച്ചു

ഛത്തീസ്ഗഢിലെ രാജ്‌നന്ദ്ഗാവ് മേഖലയില്‍ ഇടിമിന്നലേറ്റ് ആറ് കുട്ടികള്‍ ഉള്‍പ്പെടെ എട്ട് പേര്‍ മരിക്കുകയും ഒരാള്‍ക്ക് ഗുരുതരമായി പരിക്കേല്‍ക്കുകയും ചെയ്തു. പരീക്ഷ കഴിഞ്ഞ് മടങ്ങുകയായിരുന്ന പതിനൊന്നാം ക്ലാസ് വിദ്യാര്‍ത്ഥികളാണ് മരണപ്പെട്ടത്. കനത്ത മഴയെത്തുടര്‍ന്ന് കുട്ടികള്‍ ഷെഡ്ഡിനടിയില്‍ നില്‍ക്കുകയായിരുന്നെന്നും ഇതിന് സമീപത്തുണ്ടായിരുന്ന മരത്തില്‍ ഇടിമിന്നലേല്‍ക്കുകയായിരുന്നെന്നും ജില്ലാ കളക്ടര്‍ സഞ്ജയ് അഗര്‍വാള്‍ പറഞ്ഞു. മരിച്ചവരുടെ കുടുംബങ്ങള്‍ക്ക് സംസ്ഥാന സര്‍ക്കാര്‍ നാല് ലക്ഷം രൂപ ധനസഹായം പ്രഖ്യാപിച്ചു. പരിക്കേറ്റവര്‍ക്ക് നിയമപ്രകാരമുള്ള നഷ്ടപരിഹാരം തീരുമാനിക്കുമെന്നും ഉദ്യോഗസ്ഥര്‍ അറിയിച്ചു.

National92 days ago

2026 മാര്‍ച്ചോടെ നക്സലിസം തുടച്ചുനീക്കും: അമിത് ഷാ

നക്സലിസവും നക്സലിസം എന്ന ആശയവും രാജ്യത്ത് നിന്ന് പിഴുതെറിഞ്ഞ് സമാധാനം സ്ഥാപിക്കുമെന്ന് കേന്ദ്ര ആഭ്യന്തരമന്ത്രി അമിത് ഷാ. ഛത്തീസ്ഗഡിലെ നാല് ജില്ലകളിലൊഴികെ രാജ്യത്ത് നക്സലിസം അവസാനിപ്പിക്കുന്നതില്‍ നരേന്ദ്ര മോദി സര്‍ക്കാര്‍ വിജയിച്ചു. 2026 മാര്‍ച്ചിന് മുമ്പ് രാജ്യത്തെ നക്‌സലിസം അവസാനിപ്പിക്കുമെന്ന് ഉറപ്പുനല്‍കുന്നുവെന്നും അമിത് ഷാ പറഞ്ഞു. മാവോയിസ്റ്റുകള്‍ അക്രമം അവസാനിപ്പണമെന്നും ആയുധങ്ങള്‍ ഉപേക്ഷിച്ച് കീഴടങ്ങണമെന്നും അദ്ദേഹം പറഞ്ഞു.

National95 days ago

ഛത്തീസ്ഗഢിൽ സുരക്ഷാ സേനയുമായി ഏറ്റുമുട്ടൽ; ഒമ്പത് മാവോയിസ്റ്റുകൾ കൊല്ലപ്പെട്ടു

ഛത്തീസ്ഗഡിലെ ബസ്തർ മേഖലയിലാണ് സുരക്ഷാ ഉദ്യോഗസ്ഥരും മാവോയിസ്റ്റുകളും തമ്മിൽ ഏറ്റുമുട്ടലുണ്ടായത്. ഏറ്റുമുട്ടലിൽ 9 മാവോയിസ്റ്റുകളെ സുരക്ഷാ സേന വധിച്ചു. ദന്തേവാഡ, ബിജാപൂർ ജില്ലകളുടെ അതിർത്തിയിലുള്ള വനപ്രദേശത്ത് ഇന്ന് രാവിലെയാണ് സുരക്ഷ സേനയുടെ സംയുക്ത സംഘം മാവോയിസ്റ്റുകളുണ്ടെന്ന രഹസ്യവിവരത്തെ തുടർന്ന് ഓപ്പറേഷൻ ആരംഭിച്ചത്. സുരക്ഷാ ഉദ്യോഗസ്ഥരും മാവോയിസ്റ്റുകളും തമ്മിലുള്ള വെടിവെപ്പ് ദീർഘ നേരം നീണ്ടു നിന്നു. തുടർന്ന് നടത്തിയ പരിശോധനയില്‍ 9 മാവോയിസ്റ്റുകളുടെ മൃതദേഹങ്ങളും നിരവധി ആയുധങ്ങളും കണ്ടെത്തി.

National112 days ago

വന്ദേഭാരത് സ്ലീപ്പര്‍ ട്രെയിനുകള്‍ മൂന്ന് മാസത്തിനകം സര്‍വീസ് തുടങ്ങും: റെയില്‍വേ മന്ത്രി

കോച്ചുകളുടെ നിര്‍മാണം പൂര്‍ത്തിയായെന്നും നിരവധി പുതുമകളോടെയാണ് ട്രെയിൻ എത്തുന്നതെന്നും റെയില്‍വേ മന്ത്രി അശ്വിനി വൈഷ്ണവ് പറഞ്ഞു. ബെംഗളൂരുവിലെ BEML ൽ എത്തിയ മന്ത്രി കോച്ചുകൾ അടക്കം സന്ദർശിച്ച് വിലയിരുത്തൽ നടത്തി. ഓരോ ബെര്‍ത്തിലും റീഡിങ് ലൈറ്റ്, ചാര്‍ജ് ചെയ്യുന്നതിനായി സോക്കറ്റ്, മൊബൈല്‍ വയ്ക്കാനും മാസിക വയ്ക്കാനുമുള്ള സൗകര്യം, സ്നാക് ടേബിള്‍ തുടങ്ങിയവ സജ്ജമാക്കുമെന്നും മന്ത്രി അറിയിച്ചു. പരമാവധി 160 കി.മീ. വേഗത്തിൽ സഞ്ചരിക്കുന്ന ട്രെയിനിൽ AC കംപാര്‍ട്ട്മെന്‍റുകളുള്‍പ്പടെ 16 കോച്ചുകളാണ് ഉണ്ടാവുക. പൂര്‍ണമായും യൂറോപ്യന്‍ നിലവാരത്തില്‍ തയാറാക്കുന്ന കോച്ചുകള്‍ മികച്ച യാത്രാനുഭവം നല്‍കുമെന്ന് കണ്‍സള്‍ട്ടന്‍റായ ഇസി എൻജിനിയറിങ് പറഞ്ഞു.

National114 days ago

തിരുവനന്തപുരത്ത് വന്ദേഭാരത് ട്രെയിന് നേരെ കല്ലേറ്

തിരുവനന്തപുരത്ത് നിന്ന് കാസര്‍ഗോഡേയ്ക്ക് പോവുകയായിരുന്ന വന്ദേ ഭാരത് ട്രെയിന് നേരെയാണ് ആക്രമണം ഉണ്ടായത്. ആക്രമണത്തില്‍ ട്രെയിനിന്റെ ചില്ല് പൊട്ടി. അതേസമയം സംഭവത്തില്‍ ആര്‍ക്കും പരിക്കേറ്റിട്ടില്ല. കണിയാപുരത്തിനും പെരുങ്ങുഴിക്കും ഇടയിലാണ് സംഭവമുണ്ടായത്.

Kerala144 days ago

കേരളത്തിന്റെ മൂന്നാം വന്ദേഭാരത് ട്രെയിൻ യാത്ര ആരംഭിച്ചു

കേരളത്തിനുള്ള മൂന്നാം വന്ദേഭാരത് എക്സ്പ്രസ് എറണാകുളം - ബെംഗളൂരു റൂട്ടിൽ സർവീസ് ആരംഭിച്ചു. ബുധൻ, വെള്ളി, ഞായർ ദിവസങ്ങളിലാണ് എറണാകുളത്ത് നിന്നുള്ള സർവീസ്. ഉച്ചയ്ക്ക് 12:50ന് എറണാകുളത്ത് നിന്ന് യാത്ര ആരംഭിക്കുന്ന ട്രെയിൻ രാത്രി 10ന് ബെംഗളൂരു കന്‍റോൺമെന്റിൽ എത്തിച്ചേരും. വ്യാഴം, ശനി, തിങ്കൾ ദിവസങ്ങളിൽ പുലർച്ചെ 5:30ന് ബെംഗളൂരു കന്‍റോൺമെന്റിൽ നിന്ന് പുറപ്പെട്ട് ഉച്ച കഴിഞ്ഞ് 2:20ന് എറണാകുളം ജങ്ഷനിലെത്തും. നിലവിൽ ഓഗസ്റ്റ് 26 വരെയാകും സർവീസ് നടത്തുക.

Kerala146 days ago

ഛത്തീസ്ഗഢില്‍ മാവോയിസ്റ്റ് സ്‌ഫോടനം; രണ്ട് ജവാന്മാര്‍ക്ക് വീരമൃത്യു

ഛത്തീസ്ഗഢിലെ ബിജാപുര്‍ ജില്ലയില്‍ മാവോയിസ്റ്റുകള്‍ നടത്തിയ IED സ്‌ഫോടനത്തിലാണ് രണ്ട് ജവാന്മാര്‍ വീരമൃത്യു വരിച്ചത്. നാല് ജവാന്മാര്‍ക്ക് പരിക്കേറ്റിട്ടുണ്ട്. സ്റ്റേറ്റ് ടാസ്‌ക് ഫോഴ്‌സിലെ ചീഫ് കോണ്‍സ്റ്റബിള്‍ ഭരത് ലാല്‍ സാഹു, കോണ്‍സ്റ്റബിള്‍ സതേര്‍ സിങ്ങ് എന്നിവരാണ് വീരമൃത്യു വരിച്ചത്. നക്‌സല്‍ വിരുദ്ധ ഓപ്പറേഷന്‍ കഴിഞ്ഞ് തിരിച്ചു വരുന്നതിനിടെയായിരുന്നു സ്‌ഫോടനം. ബുധനാഴ്ച രാത്രിയോടെയായിരുന്നു സ്‌ഫോടനം ഉണ്ടായത്.

National159 days ago

സുരക്ഷാസേനയുമായി ഏറ്റുമുട്ടൽ: ഛത്തീസ്ഗഡിൽ 5 മാവോയിസ്റ്റുകൾ കൊല്ലപ്പെട്ടു

ഛത്തീസ്ഗഡിലെ നാരായൺപൂരിൽ സുരക്ഷാസേനയും മാവോയിസ്റ്റുകളും തമ്മിലുണ്ടായ ഏറ്റുമുട്ടലിൽ അഞ്ച് മാവോയിസ്റ്റുകൾ കൊല്ലപ്പെട്ടു. കൊഹ്കമേട്ട പോലീസ് സ്റ്റേഷൻ പരിധിയിലുള്ള വനത്തിൽ സുരക്ഷാസേന സംയുക്തമായി നടത്തിയ നക്സൽ വിരുദ്ധ ഓപ്പറേഷന്റെ ഭാഗമായുള്ള തിരച്ചിലിനിടെയാണ് വെടിവെയ്പ്പ് ഉണ്ടായത്. പ്രദേശത്ത് തിരച്ചിൽ തുടരുകയാണ്.

National174 days ago

വന്ദേഭാരത് നാളെ കൊച്ചുവേളിയിൽ നിന്ന് പ്രത്യേക സർവീസ് നടത്തും

തിരക്ക് കുറക്കുന്നതിനായാണ് കൊച്ചുവേളിയിൽ നിന്ന് മംഗളൂരുവിലേക്ക് വന്ദേഭാരത് നാളെ സ്പെഷ്യൽ സർവീസ് നടത്തുന്നത്. നാളെ രാവിലെ 10:45ന് കൊച്ചുവേളിയിൽ നിന്ന് പുറപ്പെടുന്ന ട്രെയിൻ രാത്രി പത്തിന് മംഗളൂരു സെൻട്രലിൽ എത്തിച്ചേരും. എട്ട് കോച്ചുകളാണ് ട്രെയിനിൽ ഉണ്ടാകുക.

Kerala177 days ago

വന്ദേഭാരത് എക്‌സ്പ്രസിന്റെ വേഗത കുറയ്ക്കാനൊരുങ്ങി ഇന്ത്യന്‍ റെയില്‍വെ

പ്രത്യേക റൂട്ടുകളില്‍ വന്ദേ ഭാരത്, ഗതിമാന്‍ എക്‌സ്പ്രസ് എന്നീ ട്രെയിനുകളുടെ വേഗത 160 കിലോമീറ്ററില്‍ നിന്ന് 130 കിലോമീറ്ററായി കുറയ്ക്കാനാണ് ഇന്ത്യന്‍ റെയില്‍വെ പദ്ധതിയിടുന്നത്. സുരക്ഷാ മുന്‍കരുതലുകള്‍ ശക്തിപ്പെടുത്തുന്നതിന്റെ ഭാഗമായിട്ടാണ് പദ്ധതി. ശതാബ്ദി എക്‌സ്പ്രസിന്റെ 150ല്‍ നിന്നും 130 ആക്കി കുറയ്ക്കുമെന്നും റിപ്പോര്‍ട്ടുണ്ട്. സ്പീഡ് കുറയ്ക്കുന്നത് വഴി 25 മുതല്‍ 30 മിനിറ്റ് വരെ യാത്രാസമയം കൂടും. മണിക്കൂറില്‍ 130 കിലോ മീറ്റര്‍ വേഗതയിലാണ് ഈ ട്രെയിനുകള്‍ക്ക് കൂടുതല്‍ സുരക്ഷിതമായി ഓടാന്‍ സാധിക്കുകയെന്നാണ് റെയില്‍വേ സേഫ്റ്റി കമീഷണറുടെ വിലയിരുത്തല്‍.

National180 days ago