അര്‍ജുന്റെ DNA പരിശോധന ഇന്ന്; മൃതദേഹം നാളെ വീട്ടുകാര്‍ക്കു വിട്ടുനല്‍കും

കര്‍ണാടകയിലെ ഷിരൂരിലുണ്ടായ മണ്ണിടിച്ചിലില്‍ മരണപ്പെട്ട അര്‍ജുന്റെ മൃതദേഹം DNA സാംപിള്‍ എടുത്തശേഷം നാളെ കുടുംബാംഗങ്ങള്‍ക്ക് വിട്ടുനല്‍കും. പോസ്റ്റുമോര്‍ട്ടം നടപടികളും ഇന്ന് പൂര്‍ത്തിയാക്കും. നിലവില്‍ കര്‍വാര്‍ ആശുപത്രിയിലാണ് മൃതദേഹമുള്ളത്. DNA ഫലം രണ്ടു ദിവസത്തിനുള്ളില്‍ ലഭിക്കുമെന്നാണ് പ്രതീക്ഷ. മണ്ണിടിച്ചിലില്‍ കാണാതായ ലോകേഷ്, ജഗന്നാഥന്‍ എന്നിവര്‍ക്കായുളള തെരച്ചില്‍ തുടരുമെന്നും അധികൃതര്‍ വ്യക്തമാക്കിയിട്ടുണ്ട്.

Kerala88 days ago

മൃതദേഹം അര്‍ജുന്റേത് തന്നെ; സ്ഥിരീകരിച്ച് DNA ഫലം

ഷിരൂരില്‍ ഗംഗാവലി പുഴയില്‍ നിന്നു കണ്ടെടുത്ത ലോറിയില്‍ ഉണ്ടായിരുന്നത് അര്‍ജുന്റെ ശരീരം തന്നെയെന്ന് DNA ഫലം. കണ്ടെടുത്ത ശരീരത്തിലെ DNAയും അര്‍ജുന്റെ സഹോദരന്റെ DNAയും തമ്മിലാണ് ഒത്തുനോക്കിയത്. സ്ഥിരീകരണം വന്നതോടെ മൃതദേഹ ഭാഗങ്ങള്‍ ഉടന്‍ ബന്ധുക്കള്‍ക്കു വിട്ടു നല്‍കും. ഇനി സാങ്കേതിക നടപടികള്‍ മാത്രമെ ഉള്ളൂവെന്നും നാളെ രാവിലെയോടെ മൃതദേഹം വീട്ടിലേക്ക് എത്തിക്കാന്‍ കഴിയുമെന്നാണ് കരുതുന്നതെന്ന് സഹോദരീ ഭര്‍ത്താവ് ജിതിന്‍ അറിയിച്ചു. മൃതദേഹം തിരിച്ചറിയാനാവാത്ത നിലയില്‍ ആയതിനാലാണ് DNA പരിശോധന നടത്തി ഉറപ്പിച്ചത്.

Kerala87 days ago

അര്‍ജുന്റെ മൃതദേഹം കുടുംബത്തിന് കൈമാറുന്നത് വൈകിയേക്കും

കര്‍ണാടകയിലെ ഷിരൂരില്‍ മണ്ണിടിച്ചിലില്‍ മരിച്ച കോഴിക്കോട് സ്വദേശി അര്‍ജുന്റെ മൃതദേഹം ഇന്ന് വൈകിട്ടോടെ DNA താരതമ്യ പരിശോധന പൂര്‍ത്തിയാക്കി ബന്ധുക്കള്‍ക്ക് കൈമാറാനാണ് ജില്ലാ ഭരണകൂടം ശ്രമിക്കുന്നത്. ആശുപത്രിയിലെ ഫോറന്‍സിക് വിഭാഗത്തിന്റെ വീഴ്ചയാണ് സാമ്പിള്‍ ലാബിലേക്ക് എത്തിക്കുന്നത് വൈകാന്‍ കാരണമായതെന്നാണ് പറയുന്നത്. അര്‍ജുന്റെ സഹോദരന്‍ അഭിജിത്തിന്റെ DNA സാമ്പിള്‍ ശേഖരിച്ച് താരതമ്യത്തിനായി തയ്യാറാക്കിയിട്ടുണ്ട്. രണ്ട് DNAയും ഒത്തുപോകുന്നുവെന്ന് വാക്കാല്‍ വിവരം ലഭിച്ചാല്‍ത്തന്നെ മൃതദേഹത്തിന്റെ അവശേഷിപ്പുകള്‍ ബന്ധുക്കള്‍ക്ക് വിട്ട് നല്‍കും.

Kerala87 days ago

അര്‍ജുന്റെ ലോറിയില്‍ നിന്ന് ഫോണുകളും ബാഗും കണ്ടെത്തി

ഷിരൂരില്‍ ഗംഗാവലിപുഴയില്‍ നിന്ന് കണ്ടെത്തിയ അര്‍ജുന്റെ ലോറി കരയിലെത്തിച്ച് പരിശോധിച്ചു. ലോറിയുടെ ക്യാബിനില്‍ നിന്ന് അര്‍ജുന്റെ മൊബൈല്‍ ഫോണുകള്‍, വസ്ത്രങ്ങള്‍, പാത്രങ്ങള്‍, ഭക്ഷ്യ വസ്തുക്കള്‍, ബാഗ്, വാച്ച്, കളിപ്പാട്ടം എന്നിവയൊക്കെ കണ്ടെടുത്തു. കൂടാതെ വാഹനവുമായി ബന്ധപ്പെട്ട രേഖകളും ലോറിയുടെ മെക്കാനിക് ഉപകരണങ്ങള്‍ അടങ്ങിയ ബാഗും കണ്ടെടുത്തിട്ടുണ്ട്. അതേസമയം DNA പരിശോധനയ്ക്ക് ശേഷം അര്‍ജുന്റെ മൃതദേഹഭാഗം കോഴിക്കോട്ടെ വീട്ടിലെത്തിക്കാനുള്ള ഉത്തരവാദിത്തം കേരള സര്‍ക്കാര്‍ ഏറ്റെടുക്കും.

Kerala88 days ago

അര്‍ജുന്റെ DNA പരിശോധന നടത്തണമെന്ന് കുടുംബം

ലോറിയില്‍ കണ്ടെത്തിയ മൃതദേഹ ഭാഗം അര്‍ജുന്റേതാണെന്ന് സ്ഥിരീകരിക്കാന്‍ DNA പരിശോധന നടത്തണമെന്ന് കുടുംബം ആവശ്യപ്പെട്ടു. അര്‍ജുന്റെ വീട്ടില്‍ എത്തിയ തോട്ടത്തില്‍ രവീന്ദ്രനോടാണ് കുടുംബം ഇക്കാര്യം ആവശ്യപ്പെട്ടത്. കര്‍ണാടകയിലെ കളക്ടറുമായി സംസാരിക്കുമെന്നും സര്‍ക്കാര്‍ വേണ്ട എല്ലാ സഹായവും ഉറപ്പ് നല്‍കുന്നുവെന്നും MLA പറഞ്ഞു. മൃതദേഹഭാഗം കോഴിക്കോട് എത്തിക്കാന്‍ ഉള്ള ഉത്തരവാദിത്തം കേരള സര്‍ക്കാര്‍ ഏറ്റെടുക്കുമെന്നും കുടുംബം അറിയിച്ചു.

Kerala88 days ago

അര്‍ജുന്റെ മൃതദേഹം DNA പരിശോധനയില്ലാതെ വിട്ടു നല്‍കുമെന്ന് കാര്‍വാര്‍ ജില്ലാ ഭരണകൂടം

DNA സാമ്പിള്‍ എടുത്തശേഷം അര്‍ജുന്റെ മൃതദേഹം വിട്ട് നല്‍കാനാണ് കാര്‍വാര്‍ ജില്ലാ ഭരണകൂടത്തിന്റെ തീരുമാനം. മണ്ണിടിച്ചിലുണ്ടാകുന്ന സമയത്ത് അര്‍ജുന്‍ ലോറിയില്‍ കിടന്നുറങ്ങുന്നത് കണ്ടുവെന്ന സാക്ഷി മൊഴിയുടെ അടിസ്ഥാനത്തില്‍ കൂടിയാണ് മൃതദേഹം പരിശോധനയില്ലാതെ ബന്ധുക്കള്‍ക്ക് വിട്ട് നല്‍കുന്നത്. 72 ദിവസങ്ങള്‍ക്ക് ശേഷമാണ് നദിക്കടിയിലെ ലോറിയിലെ ക്യാബിനില്‍ നിന്നും അര്‍ജുന്റെ മൃതദേഹം പുറത്തെടുത്തത്.

National89 days ago

ഷിരൂര്‍ ദൗത്യം; അര്‍ജുന്റെ ലോറിയില്‍ നിന്ന് മൃതദേഹഭാഗം പുറത്തെടുത്തു

കര്‍ണാടകയിലെ ഷിരൂരില്‍ കണ്ടെത്തിയ അര്‍ജുന്റെ ലോറിയുടെ ക്യാബിനുള്ളില്‍ കണ്ടെത്തിയ മൃതദേഹം പുറത്തെടുത്തു. എസ്ഡിആര്‍എഫ് ഉദ്യോഗസ്ഥര്‍ ലോറിയുടെ ഭാഗത്തിന് മുകളിലേക്ക് കയറിയ ശേഷമാണ് മൃതദേഹാവശിഷ്ടങ്ങള്‍ പുറത്തെടുത്തത്. ബോട്ടിലേക്ക് മാറ്റിയ ഈ ഭാഗം ഇനി വിദഗ്ദ്ധ പരിശോധനക്ക് അയക്കും. ഡിഎന്‍എ പരിശോധന നടത്തി മൃതദേഹം ഔദ്യോഗികമായി ആരുടേതാണെന്നു സ്ഥിരീകരിക്കും.

Kerala89 days ago

ഷിരൂര്‍ ദൗത്യം; അര്‍ജുന്റെ ലോറി കണ്ടെത്തി

കര്‍ണാടകയിലെ ഷിരൂര്‍ ദേശീയപാതയിലുണ്ടായ മണ്ണിടിച്ചിലില്‍ കാണാതായ കോഴിക്കോട് സ്വദേശി അര്‍ജുന്റെ ലോറി കണ്ടെത്തി. ലോറി ഉടമ മനാഫ് ഇക്കാര്യം സ്ഥിരീകരിച്ചു. ലോറിയുടെ ക്യാബിനില്‍ ഒരു മൃതദേഹം കണ്ടെത്തിയിട്ടുണ്ട്. അതേസമയം ഇത് അര്‍ജുന്റേതാണെന്ന കാര്യത്തില്‍ സ്ഥിരീകരണമായിട്ടില്ല. ജൂലൈ 16നാണ് അര്‍ജുനെ കാണാതായത്.

Kerala89 days ago

ഷിരൂര്‍ ദൗത്യം; അര്‍ജുനായി ഇന്നും തെരച്ചില്‍ തുടരും

കര്‍ണാടകയിലെ ഷിരൂര്‍ ദേശീയപാതയിലുണ്ടായ മണ്ണിടിച്ചിലില്‍ കാണാതായ കോഴിക്കോട് സ്വദേശി അര്‍ജുനായുള്ള തെരച്ചില്‍ ഇന്നും തുടരും. അതേസമയം ഉത്തര കന്നഡ ജില്ലയില്‍ ഇന്ന് റെഡ് അലര്‍ട്ടാണ്. ശക്തമായ മഴ പെയ്താല്‍ ഡ്രഡ്ജിംഗ് താല്‍ക്കാലികമായി നിര്‍ത്തേണ്ടിവരും. ഇന്നലെയും റെഡ് അലര്‍ട്ടായിരുന്നെങ്കിലും രാവിലെ മാത്രമായിരുന്നു മഴ പെയ്തത്. ഞായറാഴ്ച വരെയാണ് ഡ്രഡ്ജിംഗ് കമ്പനിക്ക് കരാര്‍ നീട്ടി നല്‍കിയിരിക്കുന്നത്.

Kerala89 days ago

ഷിരൂർ ദൗത്യം: ഇന്നത്തെ തിരച്ചിൽ പൂർത്തിയായി

മണ്ണിടിച്ചിലുണ്ടായ ഷിരൂരില്‍ കാണാതായ അര്‍ജുന്‍ ഉള്‍പ്പടെയുള്ളവര്‍ക്കായി ഡ്രഡ്ജർ എത്തിച്ചുള്ള തിരച്ചിലിലെ നാലാം ദിനവും നിരാശ. കൂടുതൽ ലോഹ സാന്നിധ്യമുണ്ടെന്ന് കണ്ടെത്തിയ സ്ഥലങ്ങളിൽ നിന്ന് പുഴയില്‍ പതിച്ച ടാങ്കര്‍ ലോറിയുടെ മഡ് ഗാര്‍ഡ് മാത്രമാണ് ഇന്ന് കണ്ടെത്തിയത്. അര്‍ജുന്റെ ലോറിയുടെ ഒരു ഭാഗവും ഇന്നത്തെ തിരച്ചിലില്‍ കണ്ടെത്താനായില്ല. ഡ്രഡ്ജിംഗ് നാളെയും തുടരുമെന്ന് കാർവാർ MLA സതീഷ് സെയിൽ പറഞ്ഞു.

National89 days ago

ഷിരൂരിൽ തെരച്ചിൽ തുടരും

ഷിരൂരിൽ മണ്ണിടിച്ചിലിൽ കാണാതായ മലയാളി ലോറി ഡ്രൈവർ അർജുൻ ഉൾപ്പെടെയുള്ളവരെ കണ്ടെത്തുന്നതിനായി ഗംഗാവലി പുഴയിലെ തെരച്ചിൽ തുടരുമെന്ന് കാർവാർ MLA സതീഷ് സെയിൽ. ഷിരൂരിൽ നാളെ റെഡ് അലർട്ട് ആയതിനാൽ സാഹചര്യം നോക്കി മാത്രമായിരിക്കും തെരച്ചിൽ തുടരുക. സാഹചര്യം അനുകൂലമല്ലെങ്കിൽ തൽക്കാലം ഒരു ദിവസം മാത്രമേ തെരച്ചിൽ നിർത്തുകയുളളൂ. കാലാവസ്ഥ അനുകൂലമാണെങ്കിൽ 10 ദിവസം തുടരുമെന്നും അദ്ദേഹം പറഞ്ഞു. അർജുന്റെ ട്രക്കിലെ മാറ്റ് കണ്ടെത്തിയെന്നും MLA പറഞ്ഞു.

National90 days ago