ADGP എം.ആർ. അജിത് കുമാറിനെതിരെ വിജിലൻസ് അന്വേഷണത്തിന് സർക്കാർ ഉത്തരവിട്ടു

ADGP എം.ആര്‍. അജിത് കുമാറിനെതിരെ അനധികൃത സ്വത്ത് സമ്പാദനവും കെട്ടിട നിര്‍മ്മാണവും ഉള്‍പ്പെടെയുള്ള കാര്യങ്ങളിൽ വിജിലന്‍സ് അന്വേഷണത്തിന് ഉത്തരവായി. DGP യുടെ ശുപാർശ അംഗീകരിച്ചുകൊണ്ടാണ് സർക്കാർ ഉത്തരവ്. സസ്പെൻഷനിലുള്ള മുന്‍ പത്തനംതിട്ട SP സുജിത് ദാസിനെതിരായ ആരോപണങ്ങളിലും വിജിലന്‍സ് അന്വേഷണം നടത്തും. അന്വേഷണ സംഘത്തെ നാളെ തീരുമാനിക്കും.

Kerala95 days ago

തൃശൂർ പൂരം അലങ്കോലമായ സംഭവം; ബാഹ്യ ഇടപെടൽ ഉണ്ടായിട്ടില്ലെന്ന് ADGP യുടെ അന്വേഷണ റിപ്പോർട്ട്

തൃശൂര്‍ പൂരം അലങ്കോലപ്പെടുത്തിയതിന് പിന്നിൽ ഗൂഢാലോചനയ്ക്ക് തെളിവില്ലെന്നും ബാഹ്യ ഇടപെടല്‍ ഉണ്ടായിട്ടില്ലെന്നും ADGP എം.ആര്‍. അജിത് കുമാറിന്റെ അന്വേഷണ റിപ്പോര്‍ട്ട്. പൂരം ഏകോപനത്തിൽ അന്നത്തെ കമ്മീഷണർ അങ്കിത് അശോകന് വീഴ്ച പറ്റിയെന്നും റിപ്പോർട്ടിൽ പറയുന്നു. പൂരം നടത്തിപ്പുമായി ബന്ധപ്പെട്ട് ചില വിട്ടുവീഴ്ചയ്ക്ക് തയ്യാറാകാതിരുന്നത് ചില പ്രശ്നങ്ങൾക്ക് കാരണമായി എന്നാണ് റിപ്പോർട്ടിലെ കണ്ടെത്തൽ. കമ്മീഷണറുടെ പരിചയക്കുറവ് കാരണമാണ് പ്രശ്നങ്ങൾ ഉണ്ടായപ്പോൾ കാരണക്കാരെ അനുനയിപ്പിക്കാൻ കഴിയാതെ വന്നതും പ്രശ്‌നം കൂടുതൽ സങ്കീർണമാക്കിയതെന്നും റിപ്പോർട്ടിൽ പറയുന്നു. 1300 പേജുള്ള റിപ്പോർട്ട് മുഖ്യമന്ത്രി ഉടൻ പരിശോധിക്കും.

Kerala93 days ago

ADGP അജിത് കുമാറിനെതിരെ വിജിലൻസ് നടത്തുക പ്രാഥമിക അന്വേഷണം മാത്രം

തിരുവനന്തപുരം പ്രത്യേക അന്വേഷണ യൂണിറ്റ് ഒന്നിനാണ് ADGP എം.ആർ. അജിത് കുമാറിനെതിരായ വിജിലൻസ് അന്വേഷണത്തിന്റെ ചുമതല. SP ജോണിക്കുട്ടിയാകും അന്വേഷണ ഉദ്യോഗസ്ഥൻ. വിജിലൻസ് മേധാവി യോഗേഷ് ഗുപ്ത അന്വേഷണത്തിന് മേൽനോട്ടം വഹിക്കും. ADGP അജിത് കുമാറിനെതിരെ കേസെടുക്കാതെ പ്രാഥമിക അന്വേഷണം മാത്രമാകും നടത്തുക. അന്വേഷണത്തിലെ കണ്ടെത്തൽ ശുപാർശയായി റിപ്പോർട്ട് നൽകും.

Kerala94 days ago

ADGP ആർഎസ്എസ് നേതാക്കളെ വ്യക്തിപരമായി കണ്ടതിൽ തെറ്റില്ല: സ്പീക്കർ എ.എൻ.ഷംസീർ

ADGP എം.ആർ. അജിത് കുമാർ RSS നേതാക്കളുമായി നടത്തിയ കൂടിക്കാഴ്ചയെ ന്യായീകരിച്ച് സ്പീക്കർ എ.എൻ. ഷംസീർ. RSS രാജ്യത്തെ പ്രധാന സംഘടനയാണെന്നും ADGP എം.ആർ. അജിത് കുമാർ RSS നേതാക്കളുമായി വ്യകതിപരമായി കൂടിക്കാഴ്ച നടത്തിയതിൽ തെറ്റില്ലെന്നുമാണ് സ്പീക്കർ എ.എൻ. ഷംസീർ പറഞ്ഞത്. സുഹൃത്ത് കൂട്ടിക്കൊണ്ട് പോയതാണെന്ന് ADGP തന്നെ പറഞ്ഞുവെന്നും അതിൽ അപാകതയൊന്നുമില്ലെന്നും പറഞ്ഞ ഷംസീർ ADGP മന്ത്രിമാരുടെ ഫോൺ സംഭാഷണങ്ങൾ ചോർത്തി എന്നത് പി.വി. അൻവർ MLA യുടെ അഭ്യൂഹം മാത്രമാണെന്നും പറഞ്ഞു.

Kerala106 days ago

ADGP എം. ആര്‍. അജിത്ത് കുമാര്‍ അവധിയില്‍ പ്രവേശിച്ചു

സ്വകാര്യ ആവശ്യത്തിനായി കുറച്ചു നാള്‍ മുമ്പ് നല്‍കിയ അപേക്ഷയിലാണ് ആഭ്യന്തര വകുപ്പ് ഇപ്പോള്‍ അവധിക്ക് അനുമതി നല്‍കിയിരിക്കുന്നത്. സെപ്റ്റംബര്‍ 14 മുതല്‍ 17വരെ 4 ദിവസത്തേക്കാണ് അവധിയില്‍ പ്രവേശിച്ചിരിക്കുന്നത്. അജിത്ത് കുമാറിനെതിരെ ഫോണ്‍ ചോര്‍ത്തല്‍, കൊലപാതകം, സ്വര്‍ണ്ണക്കടത്ത് സംഘമായുള്ള ബന്ധം അടക്കം ഗുരുതര ആരോപണങ്ങളാണ് പി. വി. അന്‍വര്‍ ഉയര്‍ത്തിയത്. ഇതേ തുടര്‍ന്ന് അജിത്ത് കുമാറിനെതിരായ അന്വേഷണത്തിന് സര്‍ക്കാര്‍ പ്രത്യേക സംഘത്തെയാണ് നിയോഗിച്ചിട്ടുള്ളത്.

Kerala107 days ago

ADGP അജിത് കുമാറിനെതിരെ CPI വയനാട് നേതൃത്വം

വയനാട്ടിലെ ഉരുൾപൊട്ടൽ രക്ഷാപ്രവർത്തനത്തിൽ ADGP എം.ആർ. അജിത് കുമാർ സർക്കാരിനെതിരെ പ്രവർത്തിച്ചെന്ന് CPI വയനാട് ജില്ലാ നേതൃത്വം. മുണ്ടക്കൈ ദുരന്ത പ്രദേശത്ത് ഭക്ഷണവിതരണം തടസപ്പെടുത്തിയത് ADGP എം.ആർ. അജിത് കുമാറാണെന്ന് CPI വയനാട് ജില്ലാ സെക്രട്ടറി ഇ.ജെ. ബാബു പറഞ്ഞു. നല്ല രീതിയിൽ പോയ രക്ഷാപ്രവർത്തനത്തിൽ അനാവശ്യ വിവാദങ്ങൾ ഉണ്ടാക്കി സർക്കാരിനെതിരെ ജനങ്ങളെ തിരിച്ചുവിടാനാണ് അജിത് കുമാർ ശ്രമിച്ചതെന്ന് ഇ.ജെ. ബാബു ആരോപിച്ചു. റവന്യൂ മന്ത്രി മാറി നിന്ന രണ്ടു ദിവസമാണ് ഈ സംഭവം ഉണ്ടായതെന്നും അദ്ദേഹം വ്യക്തമാക്കി.

Kerala112 days ago

പത്തനംതിട്ട ജില്ലാ പോലീസ് മേധാവി എസ്.സുജിത് ദാസിന് സസ്‌പെന്‍ഷന്‍

പി.വി അന്‍വര്‍ MLAയുമായുള്ള ഫോണ്‍ സംഭാഷണ വിവാദത്തിലാണ് എസ്.സുജിത് ദാസിനെ സസ്‌പെന്‍ഡ് ചെയ്യുന്നത്. പി.വി. അന്‍വറുമായുള്ള സംഭാഷണം പോലീസ് സേനയ്ക്ക് നാണക്കേട് ഉണ്ടാക്കിയെന്നും SP സര്‍വീസ് ചട്ടം ലംഘിച്ചുവെന്നും ഡിഐജി അജിതാ ബീഗം തയാറാക്കിയ റിപ്പോര്‍ട്ടില്‍ പറയുന്നു. മലപ്പുറം SPയായിരിക്കെ ഔദ്യോഗിക ക്വാര്‍ട്ടേഴ്സിലെ മരം മുറിച്ച് കടത്തി ഫര്‍ണിച്ചര്‍ നിര്‍മിച്ചതുമായി ബന്ധപ്പെട്ട പരാതി പിന്‍വലിക്കണമെന്ന് സുജിത് ദാസ്, പി.വി. അന്‍വര്‍ MLAയോട് അഭ്യര്‍ഥിക്കുന്ന ഫോണ്‍ സംഭാഷണമാണ് പുറത്തായത്.

Kerala113 days ago

പി.വി. അൻവറിന്റെ ആരോപണത്തിൽ അന്വേഷണം പ്രഖ്യാപിച്ച് മുഖ്യമന്ത്രി

പി.വി. അൻവർ എംഎൽഎ ADGP എം.ആർ. അജിത് കുമാറിനെതിരെ ഉന്നയിച്ച ആരോപണങ്ങളിൽ മുഖ്യമന്ത്രി പിണറായി വിജയൻ അന്വേഷണം പ്രഖ്യാപിച്ചു. കോട്ടയത്ത് പോലീസ് അസോസിയേഷൻ സംസ്ഥാന സമ്മേളനത്തിന്റെ ഭാഗമായുള്ള പ്രതിനിധി സമ്മേളനം ഉദ്ഘാടനം ചെയ്യുന്നതിനിടെയാണ് മുഖ്യമന്ത്രി അന്വേഷണം പ്രഖ്യാപിച്ചത്. DGP ദർവേഷ് സാഹിബിനാണ് അന്വേഷണ ചുമതല. ഇതു സംബന്ധിച്ച ഉത്തരവ് ഉടൻ പുറപ്പെടുവിക്കും. അച്ചടക്കത്തിന് നിരക്കാത്ത നടപടികൾ വെച്ചുപൊറുപ്പിക്കില്ലെന്നും ലംഘിച്ചാൽ നടപടി ഉണ്ടാകുമെന്നും മുഖ്യമന്ത്രി പറഞ്ഞു.

Kerala113 days ago

SP സുജിത് ദാസ് സർവീസ് ചട്ടം ലംഘിച്ചെന്ന് റിപ്പോർട്ട്

SP സുജിത് ദാസിനെതിരെ നടപടിക്ക് ശുപാർശയുമായി വകുപ്പുതല റിപ്പോർട്ട്. സർവീസ് ചട്ടം ലംഘിച്ചെന്നാണ് റിപ്പോർട്ട്. പി.വി. അന്‍വര്‍ MLA യെ വിളിച്ച് പരാതി പിന്‍വലിക്കാനായി സ്വാധീനിക്കാന്‍ ശ്രമിച്ചത് ഗുരുതരമായ തെറ്റാണെന്ന് തിരുവനന്തപുരം റെയ്ഞ്ച് DIG അജീതാ ബീഗം DGP നല്‍കിയ റിപ്പോര്‍ട്ടില്‍ പറയുന്നു. റിപ്പോർട്ട്‌ ‍DGP ഇന്ന് സർക്കാരിന് കൈമാറും. പോലീസ് സേനയ്ക്ക് നാണക്കേടുണ്ടായ സംഭവമാണ് ഓഡിയോ പുറത്ത് വന്നതിലൂടെ ഉണ്ടായതെന്നും റിപ്പോർട്ടിൽ പറയുന്നു.

Kerala113 days ago

ADGP എം.ആർ. അജിത് കുമാറിനെതിരായ ആരോപണം: മുഖ്യമന്ത്രി DGP യോട് റിപ്പോർട്ട് തേടി

ADGP എം.ആര്‍. അജിത് കുമാറിനെതിരായ ആരോപണങ്ങളിൽ മുഖ്യമന്ത്രി പിണറായി വിജയൻ DGP യോട് റിപ്പോർട്ട് തേടിയതിന് പിന്നാലെ IPS ഉദ്യോഗസ്ഥർ യോഗം ചേർന്നു. മുഖ്യമന്ത്രിക്ക് സമർപ്പിക്കേണ്ട റിപ്പോർട്ടിനെക്കുറിച്ച് യോഗത്തിൽ ചർച്ച ചെയ്തു എന്നാണ് സൂചന. അതേസമയം ADGP അജിത് കുമാറിനെതിരെ ഗൗരവകരമായ ആരോപണങ്ങളാണ് ഉയർന്നിരിക്കുന്നതെന്നും അദ്ദേഹത്തെ മാറ്റി നിർത്തി വിഷയത്തിൽ CBI അന്വേഷണം നടത്തണമെന്നും ആവശ്യപ്പെട്ട് പൊതുപ്രവർത്തകൻ നവാസ് DGP ക്ക് പരാതി സമർപ്പിച്ചു. ADGP എം.ആർ. അജിത് കുമാർ ആളുകളെ കൊല്ലിച്ചിട്ടുണ്ടെന്നും മന്ത്രിമാരുടേയും രാഷ്ട്രീയക്കാരുടേയും ഫോണ്‍കോള്‍ ചോര്‍ത്തുന്നുണ്ടെന്നും പി.വി. അന്‍വര്‍ MLA ആരോപണമുന്നയിച്ചിരുന്നു.

Kerala113 days ago