രാജ്യത്ത് എം പോക്സ് ഇല്ല; സ്ഥിരീകരിച്ച് ആരോഗ്യമന്ത്രാലയം

ഇന്ത്യയില്‍ ആര്‍ക്കും എം പോക്സ് ബാധയില്ലെന്ന് ആരോഗ്യമന്ത്രാലയം സ്ഥിരീകരിച്ചു. കഴിഞ്ഞ ദിവസം രോഗബാധ സംശയിച്ച യുവാവിന്റെ പരിശോധനാ ഫലം നെഗറ്റീവ് ആയി. യുവാവിനെ ഐസൊലേഷനില്‍ പ്രവേശിപ്പിച്ചിരിക്കുകയാണെന്നും ആരോഗ്യനില തൃപ്തികരമാണെന്നും അധികൃതര്‍ പറയുന്നു. അതേസമയം സംസ്ഥാനങ്ങള്‍ ജാഗ്രത തുടരണമെന്നും രോഗലക്ഷണങ്ങളുള്ള എല്ലാവരെയും നിരീക്ഷിക്കുകയും ടെസ്റ്റ് നടത്തുകയും ചെയ്യണമെന്നും ആരോഗ്യമന്ത്രാലയം വ്യക്തമാക്കി.

Health105 days ago

എംപോക്സ്: ജാഗ്രതാ നിര്‍ദേശം നല്‍കി ആരോഗ്യമന്ത്രി

സംസ്ഥാനത്ത് എം പോക്‌സ് സ്ഥിരീകരിച്ച സാഹചര്യത്തില്‍ കര്‍ശന നിര്‍ദേശങ്ങളുമായി ആരോഗ്യമന്ത്രി വീണാ ജോര്‍ജ്. രോഗം റിപ്പോര്‍ട്ട് ചെയ്ത രാജ്യങ്ങളില്‍ നിന്നും വരുന്നവര്‍ക്ക് എന്തെങ്കിലും രോഗലക്ഷണങ്ങള്‍ ഉണ്ടായാല്‍ എയര്‍പോര്‍ട്ടില്‍ റിപ്പോര്‍ട്ട് ചെയ്യാന്‍ നിര്‍ദേശം നല്‍കിയിട്ടുണ്ട്. 2022ല്‍ എംപോക്സ് സ്ഥിരീകരിച്ച സാഹചര്യത്തില്‍ സംസ്ഥാനം സ്റ്റാന്‍ഡേര്‍ഡ് ഓപ്പറേറ്റിംഗ് പ്രോസീജിയര്‍ പുറത്തിറക്കിയിരുന്നു. അതനുസരിച്ചുള്ള ഐസൊലേഷന്‍, സാമ്പിള്‍ കളക്ഷന്‍, ചികിത്സ എന്നിവയെല്ലാം ഉറപ്പ് വരുത്തിയിട്ടുണ്ട്. എല്ലാ സര്‍ക്കാര്‍, സ്വകാര്യ ആശുപത്രികളും പ്രോട്ടോകോള്‍ കൃത്യമായി പാലിക്കണമെന്നും മന്ത്രി പറഞ്ഞു.

Kerala96 days ago

സംസ്ഥാനത്ത് എം പോക്‌സ് സ്ഥിരീകരിച്ചു

മലപ്പുറത്ത് എംപോക്സ് ലക്ഷണങ്ങളോടെ ചികിത്സയിലുണ്ടായിരുന്ന വ്യക്തിയ്ക്ക് രോഗം സ്ഥിരീകരിച്ചതായി ആരോഗ്യ വകുപ്പ് മന്ത്രി വീണാ ജോര്‍ജ് അറിയിച്ചു. കഴിഞ്ഞ ആഴ്ച്ച ദുബായില്‍ നിന്നും നാട്ടിലെത്തിയ 38 വയസുകാരനാണ് രോഗം സ്ഥിരീകരിച്ചിരിക്കുന്നത്. ശരീരത്തില്‍ ചിക്കന്‍പോക്സിന് സമാനമായ ലക്ഷണങ്ങള്‍ കണ്ടതിനെ തുടര്‍ന്നാണ് യുവാവ് ചികിത്സ തേടിയത്. പ്രാഥമിക പരിശോധനയില്‍ എംപോക്സിന് സമാനമായ ലക്ഷണമുള്ളതിനാല്‍ യുവാവിനെ മഞ്ചേരി മെഡിക്കല്‍ കോളജില്‍ നിരീക്ഷണത്തില്‍ ആക്കുകയായിരുന്നു. മറ്റ് രാജ്യങ്ങളില്‍ നിന്നും സംസ്ഥാനത്ത് എത്തുന്നവര്‍ക്ക് ഉള്‍പ്പെടെ രോഗലക്ഷണങ്ങളുണ്ടെങ്കില്‍ ഉടന്‍ തന്നെ ചികിത്സ തേടണമെന്നും ആരോഗ്യ വകുപ്പിനെ വിവരം അറിയിക്കണമെന്നും മന്ത്രി അഭ്യര്‍ത്ഥിച്ചു.

Health96 days ago

മലപ്പുറത്തെ എംപോക്‌സ് ഭീതിയില്‍ ആശങ്ക വേണ്ട: മന്ത്രി വീണാ ജോർജ്

മലപ്പുറത്തെ എംപോക്‌സ് ഭീതിയിൽ ആശങ്ക വേണ്ടെന്നും ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്നും ആരോഗ്യമന്ത്രി വീണാ ജോർജ് പറഞ്ഞു. മഞ്ചേരി മെഡിക്കല്‍ കോളജില്‍ നിരീക്ഷണത്തിൽ കഴിയുന്ന യുവാവിന്റെ ശ്രവ സാമ്പിൾ പരിശോധനയ്ക്ക് അയച്ചിട്ടുണ്ടെന്നും നാളെ വൈകിട്ടോടെ പരിശോധനാ ഫലം ലഭിക്കുമെന്നും മന്ത്രി അറിയിച്ചു. കഴിഞ്ഞ ആഴ്ച ദുബായിൽ നിന്ന് നാട്ടിലെത്തിയ യുവാവിലാണ് രോഗ ലക്ഷണങ്ങളുള്ളത്. ശരീരത്തില്‍ ചിക്കന്‍പോക്‌സിന് സമാനമായ ലക്ഷണങ്ങൾ കണ്ടതിനെ തുടര്‍ന്ന് ത്വക്ക് രോഗ വിദഗ്ധനെ സമീപിക്കുകയായിരുന്നു. പ്രാഥമിക പരിശോധനയില്‍ എംപോക്‌സിന് സമാനമായ ലക്ഷണമുള്ളതിനാല്‍ യുവാവിനെ ഡോക്ടർ മെഡിക്കല്‍ കോളജില്‍ നിരീക്ഷണത്തില്‍ ആക്കുകയായിരുന്നു.

Health97 days ago

ഡൽഹിയിലെ ആശുപത്രിയിലുള്ള എംപോക്സ് രോഗി സുഖം പ്രാപിക്കുന്നു

ഡൽഹി LNJP ആശുപത്രിയിൽ ചികിത്സയിലുള്ള എംപോക്സ് രോഗി സുഖം പ്രാപിച്ചുവരുന്നതായി ആശുപത്രി മെഡിക്കൽ ഡയറക്ടർ അറിയിച്ചു. ആശങ്കപ്പെടേണ്ട സാഹചര്യം ഇല്ലെന്നും ആശുപത്രി അധികൃതർ പറഞ്ഞു. എംപോക്സ് വ്യാപനമുണ്ടായ രാജ്യത്തു നിന്നെത്തിയ യുവാവിൽ എംപോക്സിന്റെ വെസ്റ്റ് ആഫ്രിക്കൻ ക്ലേഡ് 2 എന്ന വകഭേദമാണ് സ്ഥിരീകരിച്ചത്. 2022 ജൂലൈ മുതൽ ഇന്ത്യയിൽ ഒറ്റപ്പെട്ട 30 എംപോക്സ് കേസുകൾ റിപ്പോർട്ട് ചെയ്തിട്ടുണ്ടെന്നും അത്തരത്തിൽ ഒരു ഒറ്റപ്പെട്ട കേസാണ് പുതിയതെന്നും ആരോഗ്യ മന്ത്രാലയം വ്യക്തമാക്കിയിരുന്നു.

Health102 days ago

രാജ്യത്ത് എംപോക്‌സ് ഭീതി; സംസ്ഥാനങ്ങളുടെ യോഗം വിളിക്കും

രാജ്യത്ത് എംപോക്‌സ് സ്ഥിരീകരിച്ചതിനെ തുടര്‍ന്ന് സംസ്ഥാനങ്ങള്‍ക്ക് കേന്ദ്ര ആരോഗ്യ മന്ത്രാലയം ജാഗ്രതാ നിര്‍ദേശം നല്‍കിയിട്ടുണ്ട്. തല്‍ക്കാലം ആശങ്കയുടെ സാഹചര്യം ഇല്ലെന്നാണ് ആരോഗ്യമന്ത്രാലയത്തിന്റെ വിലയിരുത്തല്‍. വിമാനത്താവളങ്ങളില്‍ കനത്ത ജാഗ്രത തുടരാന്‍ നിര്‍ദേശിച്ചിട്ടുണ്ട്. ഡല്‍ഹി സഫ്ദര്‍ജംഗ് ആശുപത്രിയില്‍ നീരീക്ഷണത്തില്‍ കഴിയുന്ന യുവാവിനാണ് എംപോക്‌സ് സ്ഥിരീകരിച്ചത്. യുവാവിന്റെ ആരോഗ്യനില തൃപ്തികരമാണെന്ന് ആരോഗ്യമന്ത്രാലയം വ്യക്തമാക്കി.

National104 days ago

രാജ്യത്ത് എംപോക്സ് സ്ഥിരീകരിച്ചു

ഇന്ത്യയില്‍ എംപോക്‌സ് വൈറസ് ബാധ സ്ഥിരീകരിച്ചു. ഡൽഹിയിൽ നിരീക്ഷണത്തിൽ കഴിഞ്ഞിരുന്ന യുവാവിന്റെ പരിശോധനാഫലം പോസിറ്റീവാണെന്ന് കേന്ദ്ര ആരോഗ്യമന്ത്രാലയം അറിയിച്ചു. ഇയാൾ വൈറസ് കേസുകള്‍ റിപ്പോര്‍ട്ട് ചെയ്യപ്പെട്ട രാജ്യത്ത് നിന്ന് എത്തിയതാണ്. ആഫ്രിക്കന്‍ ക്ലേഡ് 2 എന്ന വകഭേദമാണ് പരിശോധനയില്‍ കണ്ടെത്തിയതെന്നും രോഗബാധിതന്റെ ആരോഗ്യനില തൃപ്തികരമാണെന്നും ആരോഗ്യമന്ത്രാലയം അറിയിച്ചു.

Health105 days ago

രാജ്യത്ത് മങ്കിപോക്‌സ് ലക്ഷണമുള്ള ഒരാള്‍ നിരീക്ഷണത്തില്‍

രാജ്യത്ത് മങ്കി പോക്സ് രോഗ ലക്ഷണങ്ങളോടെ ഒരാൾ ചികിത്സയിലുള്ളതായി കേന്ദ്ര ആരോഗ്യമന്ത്രാലയം അറിയിച്ചു. മങ്കിപോക്സ് സ്ഥിരീകരിച്ച വിദേശരാജ്യത്ത് നിന്നെത്തിയ ആളാണ് ചികിത്സയിലുള്ളത്. ഇയാളുടെ സാമ്പിളുകള്‍ വിശദമായ പരിശോധനക്ക് അയച്ചിട്ടുണ്ട്. ആശങ്കപ്പെടേണ്ട സാഹചര്യമില്ലെന്നും ഇയാൾ നിലവിൽ ആശുപത്രിയിൽ ഐസൊലേഷനിലാണെന്നും ആരോഗ്യനില തൃപ്തികരമാണെന്നും ആരോഗ്യ മന്ത്രാലയം അറിയിച്ചു.

Health106 days ago

ഡോക്ടര്‍മാരുടെ സുരക്ഷ ഉറപ്പാക്കുമെന്ന് കേന്ദ്ര ആരോഗ്യ മന്ത്രാലയം

ആരോഗ്യപ്രവര്‍ത്തകരുടെ സുരക്ഷ സംബന്ധിച്ചുള്ള നിർദേശങ്ങൾ രൂപീകരിക്കുന്നതിനായി സമിതിയെ നിയോഗിച്ച കേന്ദ്ര ആരോഗ്യമന്ത്രാലയം ഡോക്ടർമാരുടെ സുരക്ഷ ഉറപ്പാക്കാൻ സാധ്യമായ ശ്രമങ്ങൾ നടത്തുമെന്നും ഉറപ്പ് നൽകി. സുരക്ഷാ പ്രശ്‌നങ്ങള്‍ പരിഹരിക്കാന്‍ വേണ്ട നടപടികള്‍ സ്വീകരിക്കുമെന്നും അറിയിച്ചു. ഫെഡറേഷന്‍ ഓഫ് റസിഡന്റ് ഡോക്ടേഴ്സ് അസോസിയേഷന്‍ (ഫോര്‍ഡ), ഇന്ത്യന്‍ മെഡിക്കല്‍ അസോസിയേഷന്‍ (IMA) പ്രതിനിധികള്‍ ആരോഗ്യമന്ത്രാലയവുമായി നടത്തിയ ചര്‍ച്ചയിലാണ് തീരുമാനം. ഡോക്ടര്‍മാര്‍ സമരത്തില്‍ നിന്ന് പിന്മാറണമെന്നും ജോലി പുനഃരാരംഭിക്കണമെന്നും മന്ത്രാലയം അഭ്യർത്ഥിച്ചു.

National128 days ago