പാരാലിംപിക്‌സ്: ഷൂട്ടിങ്ങില്‍ ഇന്ത്യക്ക് സ്വര്‍ണം

പാരീസ് പാരാലിംപിക്‌സില്‍ സുവര്‍ണ നേട്ടവുമായി ഇന്ത്യ. വനിതകളുടെ 10 മീറ്റര്‍ എയര്‍ റൈഫിള്‍ SH1 ഇനത്തില്‍ ഇന്ത്യയുടെ അവനി ലെഖാര സ്വര്‍ണവും മോണ അഗര്‍വാള്‍ വെങ്കലവും നേടി. 2020 ലെ ടോക്കിയോ പാരാലിംപിക്‌സിലും ഇതേയിനത്തില്‍ അവനി സ്വര്‍ണം നേടിയിരുന്നു. ഇതോടെ പാരാലിംപിക്‌സില്‍ രണ്ട് സ്വര്‍ണം നേടുന്ന ആദ്യ ഇന്ത്യന്‍ വനിതയായി അവനി മാറി.

Sports116 days ago

മണിപ്പൂരില്‍ വീണ്ടും വെടിവെയ്പ്പ്; അഞ്ച് പേര്‍ കൊല്ലപ്പെട്ടു

മണിപ്പൂരിലെ ജിരിബാം ജില്ലയില്‍ ഇന്ന് രാവിലെയാണ് വെടിവെയ്പ്പുണ്ടായത്. ആക്രമണത്തില്‍ അഞ്ച് പേര്‍ കൊല്ലപ്പെട്ടതായി പോലീസ് അറിയിച്ചു. ഓഗസ്റ്റ് ഒന്നിന് അസമിലെ കച്ചാറിനോട് ചേര്‍ന്നുള്ള CRPF കേന്ദ്രത്തില്‍ നടന്ന യോഗത്തില്‍ വംശീയ ഗ്രൂപ്പുകളുടെ പ്രതിനിധികള്‍ സംസ്ഥാനത്ത് സമാധാനം പുനഃസ്ഥാപിക്കുന്നതിനായി ധാരണയിലെത്തിയിരുന്നു. ഇതിന് പിന്നാലെയാണ് സംസ്ഥാനം വീണ്ടും അക്രമങ്ങള്‍ക്ക് സാക്ഷ്യം വഹിക്കുന്നത്. കഴിഞ്ഞ വര്‍ഷം മെയ് മുതല്‍ ആരംഭിച്ച വംശീയ സംഘര്‍ഷത്തില്‍ മണിപ്പൂരില്‍ 200ലധികം ആളുകള്‍ കൊല്ലപ്പെടുകയും ആയിരക്കണക്കിന് ആളുകള്‍ ഭവനരഹിതരാകുകയും ചെയ്തു.

National108 days ago

പാരാലിമ്പിക്‌സ്: ഹൈജമ്പിൽ ഇന്ത്യയ്ക്ക് സ്വർണം

പാരീസ് പാരാലിമ്പിക്‌സില്‍ ആറാം സ്വര്‍ണവുമായി ഇന്ത്യയുടെ കുതിപ്പ്. ഹൈജമ്പില്‍ പ്രവീണ്‍ കുമാറാണ് ഏഷ്യൻ റെക്കോർഡോടെ ഇന്ത്യക്കായി സ്വര്‍ണം സ്വന്തമാക്കിയത്. പുരുഷന്‍മാരുടെ ഹൈജമ്പ് ടി64 വിഭാഗത്തില്‍ 2.08 മീറ്റര്‍ ഉയരത്തില്‍ ചാടിയാണ് താരം സ്വര്‍ണമണിഞ്ഞത്. മാരിയപ്പന്‍ തങ്കവേലുവിന് ശേഷം പാരാലിമ്പിക്‌സ് ജമ്പിങ് ഇനത്തില്‍ സ്വര്‍ണ മെഡല്‍ നേടുന്ന രണ്ടാമത്തെ ഇന്ത്യന്‍ താരമാണ് 21കാരനായ പ്രവീണ്‍. ടോക്യോ പാരാലിമ്പിക്‌സിലും നോയിഡ സ്വദേശിയായ പ്രവീണ്‍ വെള്ളി മെഡല്‍ കരസ്ഥമാക്കിയിരുന്നു. ആറ് സ്വര്‍ണവും ഒമ്പത് വെള്ളിയും 11 വെങ്കലവുമടക്കം 26 മെഡലുകളാണ് പാരീസ് പാരാലിമ്പിക്‌സില്‍ ഇന്ത്യയുടെ ഇതുവരെയുള്ള നേട്ടം.

Sports108 days ago

പാരാലിംപിക്‌സ്: ക്ലബ് ത്രോയില്‍ സ്വര്‍ണവും വെള്ളിയും നേടി ഇന്ത്യ

പാരിസ് പാരാലിംപിക്‌സില്‍ മെഡല്‍ വേട്ട തുടര്‍ന്ന് ഇന്ത്യ. പുരുഷ വിഭാഗം ക്ലബ് ത്രോയില്‍ (എഫ്51) ഇന്ത്യയുടെ ധരംബീര്‍ നായിന്‍ സ്വര്‍ണവും പ്രണവ് സൂര്‍മ വെള്ളിയും നേടി. ഇതോടെ ആകെ 24 മെഡലുമായി ഇന്ത്യ പോയിന്റ് പട്ടികയില്‍ 13 ആം സ്ഥാനത്തെത്തി. നേരത്തെ ആര്‍ച്ചറിയില്‍ പുരുഷന്‍മാരുടെ വ്യക്തിഗത റികര്‍വ് ഓപ്പണ്‍ വിഭാഗത്തില്‍ ഹരിയാന സ്വദേശി ഹര്‍വീന്ദര്‍ സിങ്ങും സ്വര്‍ണം നേടിയിരുന്നു. പാരാലിംപിക്‌സ് ആര്‍ച്ചറിയില്‍ സ്വര്‍ണം നേടുന്ന ആദ്യ ഇന്ത്യന്‍ താരമെന്ന റെക്കോര്‍ഡും സിങ് സ്വന്തമാക്കി.

Sports110 days ago

അമേരിക്കയില്‍ സ്‌കൂളില്‍ വെടിവെയ്പ്പ്; നാല് മരണം

ജോര്‍ജിയയിലെ വൈന്‍ഡര്‍ നഗരത്തിലെ അപലാച്ചി ഹൈസ്‌കൂളിലാണ് വെടിവെയ്പ്പുണ്ടായത്. വെടിവെയ്പ്പില്‍ രണ്ട് വിദ്യാര്‍ത്ഥികളുള്‍പ്പെടെ നാല് പേര്‍ കൊല്ലപ്പെട്ടു. ഒന്‍പത് പേര്‍ക്ക് പരുക്കേറ്റു. ഇതേ സ്‌കൂളിലെ വിദ്യാര്‍ത്ഥിയായ 14കാരനാണ് വെടിയുതിര്‍ത്തത്. പ്രതിയെ കസ്റ്റഡിയിലെടുത്തെന്നും കൊലപാതകകുറ്റം ചുമത്തുമെന്നും അധികൃതര്‍ അറിയിച്ചു. സംഭവത്തില്‍ അമേരിക്കന്‍ പ്രസിഡന്റ് ജോ ബൈഡന്‍ അനുശോചനം രേഖപ്പെടുത്തി.

World110 days ago

പാരാലിംപിക്‌സ്: ഷോട്ട്പുട്ടില്‍ വെള്ളി നേടി ഇന്ത്യയുടെ സച്ചിന്‍ ഖിലാരി

പാരാലിംപിക്‌സ് പുരുഷവിഭാഗം ഷോട്ട്പുട്ടില്‍ വെള്ളി മെഡല്‍ നേടി ഇന്ത്യന്‍ താരം സച്ചിന്‍ ഖിലാരി. പുരുഷവിഭാഗം എഫ്46 വിഭാഗത്തില്‍ 16.32 മീറ്റര്‍ ദൂരം എറിഞ്ഞാണ് സച്ചിന്റെ മെഡല്‍ നേട്ടം. ഇതോടെ പാരിസ് പാരാലിംപിക്‌സില്‍ ഇന്ത്യയുടെ മെഡല്‍ നേട്ടം 21 ആയി ഉയര്‍ന്നു. ഇന്ന് നടന്ന മറ്റ് മത്സരങ്ങളില്‍ ജാവലിന്‍ ത്രോയില്‍ ഇന്ത്യയുടെ അജീത്ത് സിംഗ് വെള്ളിയും സുന്ദര്‍ സിംഗ് വെങ്കലവും നേടിയപ്പോള്‍ ഹൈ ജംപില്‍ ഇന്ത്യയുടെ ശരത് കുമാര്‍ വെളളിയും മാരിയപ്പന്‍ തങ്കവേലു വെങ്കലവും സ്വന്തമാക്കിയിരുന്നു.

Sports111 days ago

പാരാലിമ്പിക്സ്: ബാഡ്മിന്റണില്‍ സ്വര്‍ണനേട്ടവുമായി നിതേഷ് കുമാര്‍

പാരിസ് പാരാലിമ്പിക്സില്‍ വീണ്ടും സ്വര്‍ണ നേട്ടവുമായി ഇന്ത്യ. പുരുഷ സിംഗിള്‍സില്‍ ഇന്ത്യയുടെ നിതേഷ് കുമാര്‍ സ്വര്‍ണ മെഡല്‍ നേടി. പാരാലിമ്പിക്സ് ബാഡ്മിന്റണില്‍ ഇതാദ്യമായാണ് ഇന്ത്യ സ്വര്‍ണം നേടുന്നത്. നേരത്തെ ഡിസ്‌കസ് ത്രോ താരം യോഗേഷ് കത്തൂനിയ ഇന്ത്യയ്ക്കായി വെള്ളി മെഡല്‍ സ്വന്തമാക്കിയിരുന്നു. ടോക്യോയിലും യോഗേഷ് വെള്ളി നേടിയിരുന്നു.

Sports113 days ago

ഒളിംപിക്‌സ്: ഇന്ത്യക്ക് മൂന്നാം മെഡല്‍ നേട്ടം

ഷൂട്ടിങില്‍ വെങ്കല മെഡല്‍ നേടിയാണ് ഇന്ത്യ മൂന്നാം മെഡല്‍ സ്വന്തമാക്കിയത്. പുരുഷന്മാരുടെ 50 മീറ്റര്‍ റൈഫിള്‍ 3 പൊസിഷനില്‍ ഇന്ത്യയുടെ സ്വപ്നില്‍ കുസാലെയാണ് വെങ്കലം നേടിയത്. 451.4 പോയിന്റുകളാണ് സ്വപ്‌നില്‍ നേടിയത്. ആദ്യ രണ്ട് പൊസിഷനുകളിലും അഞ്ചാം സ്ഥാനത്തായിരുന്ന സ്വപ്നില്‍ മൂന്നാം പൊസിഷനിലാണ് മൂന്നാം സ്ഥാനമുറപ്പിച്ചത്. ഇന്ത്യക്ക് മൂന്ന് മെഡലും സമ്മാനിച്ചത് ഷൂട്ടര്‍മാരാണ്.

Sports145 days ago

പാരീസ് ഒളിംപിക്‌സില്‍ ഇന്ത്യയ്ക്ക് രണ്ടാം മെഡല്‍

10 മീറ്റര്‍ എയര്‍ പിസ്റ്റല്‍ മിക്‌സഡ് ടീം ഇനത്തില്‍ മനു ഭാകറും സരബ്ജോത് സിങും ചേര്‍ന്നാണ് ഇന്ത്യയ്ക്കായി വെങ്കല മെഡല്‍ നേടിയത്. 16-10 എന്ന സ്‌കോറിനാണ് ഇന്ത്യ മെഡല്‍ സ്വന്തമാക്കിയത്. കൊറിയന്‍ താരങ്ങളായ വോന്‍ഹോ ലീ, ജിന്‍ ഓയെ സഖ്യത്തെയാണ് ഇരുവരും വീഴ്ത്തിയത്. പാരിസ് ഒളിംപിക്‌സില്‍ മനു ഭാകറിന്റെ രണ്ടാം മെഡല്‍ നേട്ടമാണിത്. ഇതോടെ ഒറ്റ ഒളിംപിക്‌സില്‍ രണ്ട് മെഡലുകള്‍ നേടുന്ന ആദ്യ ഇന്ത്യന്‍ വനിതാ താരമായി മനു ഭാകര്‍.

Sports147 days ago

ഒളിംപിക്‌സ്: ഷൂട്ടിങില്‍ പ്രതീക്ഷയുമായി ഇന്ത്യ

ഒളിംപിക്സിന്റെ രണ്ടാം ദിനത്തില്‍ ഷൂട്ടിങില്‍ ഇന്ത്യന്‍ താരം രമിത ജിന്‍ഡാല്‍ ഫൈനലില്‍ പ്രവേശിച്ചു. വനിതകളുടെ 10 മീറ്റര്‍ എയര്‍ റൈഫിള്‍ വിഭാഗത്തിലാണ് താരം മുന്നേറിയത്. 635.5 പോയിന്റുകള്‍ നേടിയാണ് രമിതയുടെ മുന്നേറ്റം. യോഗ്യതാ പോരാട്ടത്തില്‍ അഞ്ചാമതായാണ് താരം ഫിനിഷ് ചെയ്തത്. ഫൈനലില്‍ എട്ട് പേരാണുള്ളത്.

Sports149 days ago

പാരിസ് ഒളിമ്പിക്‌സ്: ഷൂട്ടിങ്ങില്‍ ഇന്ത്യക്ക് നിരാശ, ഫൈനല്‍ റൗണ്ടില്‍ കടക്കാനായില്ല

പാരിസ് ഒളിമ്പിക്‌സിലെ 10 മീറ്റര്‍ എയര്‍റൈഫിള്‍ മിക്സഡ് ഇനത്തില്‍ ഇന്ത്യയ്ക്ക് ഫൈനല്‍ റൗണ്ടിലേക്ക് കടക്കാനായില്ല. ഇന്ത്യക്കായി മത്സരിച്ച അര്‍ജുന്‍ ബാബുട്ട-രമിത സഖ്യം 628.7 പോയിന്റോടെ ആറാം സ്ഥാനത്തും സന്ദീപ് സിങ്-എളവേണില്‍ വളരിവാന്‍ സഖ്യം 626.3 പോയിന്റോടെ 12-ാം സ്ഥാനത്തും എത്തി. ആദ്യ നാലിലെത്തുന്നവര്‍ക്ക് മാത്രമാണ് ഫൈനല്‍ റൗണ്ടിലേക്ക് എത്താനാകുക. ചൈന, കൊറിയ, ഖസാക്കിസ്ഥാന്‍ എന്നീ രാജ്യങ്ങളാണ് യഥാക്രമം ആദ്യ സ്ഥാനങ്ങളിലെത്തിയത്.

Sports150 days ago