പ്രേംകുമാർ ചലച്ചിത്ര അക്കാദമിയുടെ താൽക്കാലിക ചെയർമാനായേക്കും

വിവാദങ്ങളുടെ പശ്ചാത്തലത്തിൽ സംവിധായകൻ രഞ്ജിത്ത് കേരള സംസ്ഥാന ചലച്ചിത്ര അക്കാദമിയുടെ ചെയർമാൻ സ്ഥാനം രാജിവെച്ചതോടെ അക്കാദമിയുടെ വൈസ് ചെയർമാനായ നടൻ പ്രേംകുമാർ താൽക്കാലിക ചെയർമാനായേക്കുമെന്ന് സൂചന. 2022 ൽ ബീന പോൾ സ്ഥാനമൊഴിഞ്ഞതിന് ശേഷമാണ് പ്രേംകുമാർ വൈസ് ചെയർമാനായി സ്ഥാനം ഏറ്റെടുത്തത്. രഞ്ജിത്തിനെതിരായ ആരോപണത്തിന്റെ ഗൗരവം കണക്കിലെടുത്ത് അക്കാദമിയിൽ നിന്നും സിനിമാരംഗത്ത് നിന്നും രഞ്ജിത്ത് സ്ഥാനമൊഴിയണമെന്ന് അഭിപ്രായം ഉയർന്നിരുന്നു. തനിക്കെതിരെയുണ്ടായ ആരോപണങ്ങളുടെ പശ്ചാത്തലത്തിൽ നടൻ സിദ്ദിഖ് അമ്മ ജനറൽ സെക്രട്ടറി സ്ഥാനം ഒഴിഞ്ഞതിന് പിന്നാലെയാണ് രഞ്ജിത്തും രാജിവെച്ചത്.

Kerala122 days ago

സംവിധായകന്‍ രഞ്ജിത്തിനെതിരായ പീഡനപരാതിയില്‍ ബംഗാളി നടിയുടെ മൊഴി രേഖപ്പെടുത്തി

സംവിധായകൻ രഞ്ജിത്തിനെതിരായ ലൈംഗികാതിക്രമ പരാതിയിൽ ബംഗാളി നടി കൊൽക്കത്ത സെഷൻസ് കോടതിയില്‍ രഹസ്യ മൊഴി നല്‍കി. 2009 ൽ 'പാലേരി മാണിക്യം' എന്ന സിനിമയിൽ അഭിനയിക്കാന്‍ എത്തിയപ്പോള്‍ സംവിധായകൻ രഞ്ജിത്ത് മോശമായി പെരുമാറിയെന്നും ലൈംഗിക ചൂഷണത്തിന് ശ്രമമുണ്ടായെന്നുമാണ് നടിയുടെ പരാതി.

Kerala96 days ago

ലൈംഗികാതിക്രമക്കേസ്; സംവിധായകന്‍ രഞ്ജിത്തിനെ ചോദ്യം ചെയ്യുന്നു

ലൈംഗികാതിക്രമക്കേസില്‍ സംവിധായകന്‍ രഞ്ജിത്തിനെ പ്രത്യേക അന്വേഷണ സംഘമാണ് ചോദ്യം ചെയ്യുന്നത്. ബംഗാളി നടി നല്‍കിയ പരാതിയിലും കോഴിക്കോട് സ്വദേശി നല്‍കിയ പീഡന പരാതിയിലുമാണ് ചോദ്യം ചെയ്യല്‍ നടക്കുന്നത്. കേസില്‍ അന്വേഷണ ഉദ്യോഗസ്ഥന് മുന്നില്‍ ഹാജരാകണമെന്നും അന്വേഷണത്തോട് സഹകരിക്കണമെന്നും ചൂണ്ടിക്കാട്ടി രഞ്ജിത്തിന് കോടതി ജാമ്യം നല്‍കിയിരുന്നു. പരാതിക്കാരില്‍ നിന്നും പ്രത്യേക അന്വേഷണ സംഘം രഞ്ജിത്തിനെതിരായ വിവരങ്ങള്‍ ശേഖരിച്ചിരുന്നു.

Kerala104 days ago

പീഡന പരാതി; സംവിധായകന്‍ രഞ്ജിത്തിന് മുന്‍കൂര്‍ ജാമ്യം

യുവാവിന്റെ ലൈംഗികപീഡിന പരാതിയില്‍ സംവിധായകന്‍ രഞ്ജിത്തിന് മുന്‍കൂര്‍ ജാമ്യം. കോഴിക്കോട് പ്രിന്‍സിപ്പല്‍ സെഷന്‍സ് കോടതി മുപ്പതുദിവസത്തേക്കാണ് താല്‍കാലിക ജാമ്യം അനുവദിച്ചത്. അരലക്ഷം രൂപയുടെ രണ്ട് ആള്‍ ജാമ്യത്തിലാണ് ജാമ്യം അനുവദിച്ചിരിക്കുന്നത്. കോഴിക്കോട് മാങ്കാവ് സ്വദേശിയായ യുവാവിനെ സിനിമയില്‍ അവസരം വാഗ്ദാനം ചെയ്ത് ബെംഗളുരുവിലെ ഹോട്ടലില്‍ വെച്ച് പീഡിപ്പിച്ചുവെന്നാണ് പരാതി. പ്രകൃതി വിരുദ്ധ പീഡനം, ഐടി ആക്ട് എന്നിവ പ്രകാരമാണ് രഞ്ജിത്തിനെതിരെ കേസ് എടുത്തത്.

Kerala107 days ago

ലൈംഗികാതിക്രമക്കേസ്‌: രഞ്ജിത്തിനെതിരായ പരാതി ബെംഗളൂരു പൊലീസിന് കൈമാറും

സംവിധായകന്‍ രഞ്ജിത്തിനെതിരെ കോഴിക്കോട് കസബ പോലീസ് രജിസ്റ്റർ ചെയ്ത ലൈംഗികാതിക്രമക്കേസ്‌ ബെംഗളൂരു പൊലീസിന് കൈമാറും. കോഴിക്കോട് മാങ്കാവ് സ്വദേശിയായ യുവാവ് നല്‍കിയ പരാതിയിലാണ് പോലീസ് രഞ്ജിത്തിനെതിരെ കേസെടുത്തത്. ബംഗളൂരുവിലെ ഹോട്ടലില്‍ വെച്ച് രഞ്ജിത് ലൈംഗികമായി പീഡിപ്പിച്ചു എന്നാണ് യുവാവ് പരാതിയില്‍ പറയുന്നത്. യുവാവിന്റെ മൊഴി അടക്കം പ്രാഥമിക അന്വേഷണം നടത്തിയ ശേഷമാണ് രഞ്ജിത്തിനെതിരായ കേസ് കര്‍ണാടക പൊലീസിന് കൈമാറുന്നത്.

Kerala108 days ago

ലൈംഗികാതിക്രമ പരാതി; രഞ്ജിത്തിന്റെ മുന്‍കൂര്‍ ജാമ്യാപേക്ഷ തീര്‍പ്പാക്കി

രഞ്ജിത്തിനെതിരെ ചുമത്തിയിട്ടുള്ളത് ജാമ്യം ലഭിക്കാവുന്ന കുറ്റമാണെന്നും അറസ്റ്റ് ചെയ്താലും സ്റ്റേഷനില്‍ നിന്നു ജാമ്യം ലഭിക്കുമെന്നും സര്‍ക്കാര്‍ കോടതിയെ അറിയിച്ചു. ഈ വാദം അംഗീകരിച്ചാണ് ഹൈക്കോടതി മുന്‍കൂര്‍ ജാമ്യാപേക്ഷ തീര്‍പ്പാക്കിയത്. സിനിമയില്‍ അഭിനയിക്കാനായി വിളിച്ചു വരുത്തിയശേഷം ലൈംഗികാതിക്രമം നടത്തിയെന്ന ബംഗാളി നടി ശ്രീലേഖ മിത്രയുടെ പരാതിയിലാണ് രഞ്ജിത്ത് മുന്‍കൂര്‍ ജാമ്യം തേടി ഹൈക്കോടതിയെ സമീപിച്ചത്.

Kerala112 days ago

പ്രേം കുമാർ ചലച്ചിത്ര അക്കാദമി ചെയർമാൻ

ചലച്ചിത്ര അക്കാദമി ചെയര്‍മാനായി നടന്‍ പ്രേംകുമാറിന് ചുമതല. താല്‍ക്കാലിക ചുമതലയാണ് നല്‍കിയിരിക്കുന്നത്. ചലച്ചിത്ര അക്കാദമിയുടെ വൈസ് ചെയർമാനാണ് അദ്ദേഹം. ചെയർമാൻ സ്ഥാനത്തു നിന്നും രഞ്ജിത്ത് രാജിവച്ച സാഹചര്യത്തിലാണ് പ്രേംകുമാറിന് അധിക ചുമതല നൽകിയത്. സാംസ്‌കാരിക വകുപ്പ് ഇത് സംബന്ധിച്ച ഉത്തരവിറക്കി. ഇതാദ്യമായാണ് അക്കാദമി ചെയർമാൻ സ്ഥാനത്ത് സംവിധായകൻ അല്ലാത്ത ഒരാൾ വരുന്നത്.

Entertainment113 days ago

അസുഖബാധിതനായി ആശുപത്രിയില്‍; ലൈംഗികാതിക്രമ കേസില്‍ ഹര്‍ജിയുമായി രഞ്ജിത്ത്

ബംഗാളി നടിയുടെ പരാതിയിലെടുത്ത ലൈംഗികാതിക്രമ കേസില്‍ മുന്‍കൂര്‍ ജാമ്യത്തിനായാണ് സംവിധായകന്‍ രഞ്ജിത്ത് ഹര്‍ജി നല്‍കിയത്. താന്‍ അസുഖബാധിതനായി ചികിത്സയിലാണെന്നും പോലീസ് അറസ്റ്റ് ചെയ്യാന്‍ സാധ്യതയുണ്ടെന്നും അറസ്റ്റ് തടയണമെന്നും രഞ്ജിത്ത് ഹര്‍ജിയില്‍ പറയുന്നു. സിനിമയില്‍ അവസരം നല്‍കാത്തതിലെ നിരാശയിലാണ് ബംഗാളി നടിയുടെ പരാതിയെന്ന് രഞ്ജിത്ത് ഹര്‍ജിയില്‍ പറയുന്നു. രഞ്ജിത്തിന്റെ പാലേരിമാണിക്യം സിനിമയിലഭിനയിക്കാന്‍ കൊച്ചിയിലെത്തിയ തന്നെ ലൈംഗിക ഉദ്ദേശ്യത്തോടെ രഞ്ജിത്ത് സമീപിച്ചുവെന്നാണ് നടി വെളിപ്പെടുത്തിയത്.

Kerala113 days ago

രഞ്ജിത്തിനെതിരായ കേസ് പ്രത്യേക അന്വേഷണ സംഘത്തിന് കൈമാറി

ചലച്ചിത്ര അക്കാദമി മുന്‍ ചെയര്‍മാനും സംവിധായകനുമായ രഞ്ജിത്തിനെതിരെ കോഴിക്കോട്ട് രജിസ്റ്റര്‍ ചെയ്ത രണ്ടു കേസുകളും പ്രത്യേക അന്വേഷണ സംഘത്തിന് കൈമാറി. മാങ്കാവ് സ്വദേശിയായ യുവാവിന്റെ പരാതിയില്‍ കസബ പോലീസെടുത്ത കേസും കോഴിക്കോട്ട് രജിസ്റ്റര്‍ ചെയ്ത മറ്റൊരു കേസുമാണ് കൈമാറിയിരിക്കുന്നത്. കേസില്‍ ഇനി ചോദ്യം ചെയ്യല്‍ അടക്കമുള്ള നിയമ നടപടികള്‍ സ്വീകരിക്കുക പ്രത്യേക അന്വേഷണ സംഘമാണ്.

Kerala116 days ago

രഞ്ജിത്തിനെതിരായ പരാതി; യുവാവിന്റെ മൊഴി രേഖപ്പെടുത്തി

സംവിധായകന്‍ രഞ്ജിത്തിനെതിരെ ലൈംഗിക പീഡന പരാതി നല്‍കിയ യുവാവിന്റെ മൊഴി അന്വേഷണസംഘം രേഖപ്പെടുത്തി. ഐശ്വര്യ ഡോങ്റെ ഉള്‍പ്പെട്ട പ്രത്യേക അന്വേഷണ സംഘം കോഴിക്കോട് കാരപ്പറമ്പില്‍ എത്തിയാണ് മൊഴി രേഖപ്പെടുത്തിയത്. അതേസമയം കേസ് പിന്‍വലിക്കാന്‍ സമ്മര്‍ദവും ഭീഷണിയും ഉണ്ടെന്നും പലരും സ്വാധീനിക്കാന്‍ ശ്രമിക്കുന്നുവെന്നും നിയമപരമായി മുന്നോട്ടുപോകുമെന്നും യുവാവ് വ്യക്തമാക്കി. 2012ല്‍ സിനിമയില്‍ അവസരം വാഗ്ദാനം നല്‍കി ബെംഗളൂരുവിലെ ഹോട്ടലില്‍ വെച്ച് രഞ്ജിത്ത് ലൈംഗികാതിക്രമത്തിന് ഇരയാക്കിയെന്നാണ് യുവാവിന്റെ പരാതി.

Kerala117 days ago

സംവിധായകന്‍ രഞ്ജിത്തിനെതിരെ പീഡന പരാതിയുമായി യുവാവ്

സംവിധായകന്‍ രഞ്ജിത്തിനെതിരെ വീണ്ടും ലൈംഗിക പീഡന പരാതി. കോഴിക്കോട് സ്വദേശിയായ യുവാവാണ് പരാതി നല്‍കിയിരിക്കുന്നത്. 2012ല്‍ സിനിമയില്‍ അവസരം വാഗ്ദാനം ചെയ്ത് ബെംഗളൂരുവിലെ ഹോട്ടലിലേക്ക് വിളിച്ചുവരുത്തി പീഡിപ്പിച്ചെന്നാണ് പരാതി. നേരത്തെ ഒരു ബംഗാളി നടിയും രഞ്ജിത്തിനെതിരെ പരാതി നല്‍കിയിരുന്നു. ഇതിന് പിന്നാലെ പ്രതിഷേധം ശക്തമായതോടെ രഞ്ജിത്ത് ചലച്ചിത്ര അക്കാദമി ചെയര്‍മാന്‍ സ്ഥാനം രാജിവെച്ചിരുന്നു.

Kerala118 days ago