ടി20 ലോകകപ്പ് കിരീടനേട്ടം: ഇന്ത്യൻ ടീമിന് പാരിതോഷികം പ്രഖ്യാപിച്ച് BCCI

ട്വന്‍റി 20 ലോകകപ്പ് കിരീടം നേടിയ ടീം ഇന്ത്യക്ക് BCCI 125 കോടി രൂപ പാരിതോഷികം പ്രഖ്യാപിച്ചു. BCCI സെക്രട്ടറി ജയ് ഷായാണ് സമൂഹമാധ്യമമായ എക്സിലൂടെ ഇക്കാര്യം അറിയിച്ചത്. ലോകകപ്പ് കിരീടനേട്ടത്തിൽ പങ്കാളികളായ കളിക്കാരും പരിശീലകരും മറ്റ് സപ്പോർട്ട് സ്റ്റാഫുകളും ഉൾപ്പെടുന്ന ടീമിനാണ് 125 കോടി ലഭിക്കുക. ലോകകപ്പ് നേട്ടത്തിൽ പങ്കാളികളായ എല്ലാരേയും അഭിനന്ദിച്ച ജയ് ഷാ ടൂർണമെന്റിൽ ഉടനീളം ഇന്ത്യൻ ടീം അസാമാന്യമായ കഴിവും നിശ്ചയദാർഢ്യവും പ്രകടിപ്പിച്ചെന്നും എക്സിൽ പങ്കുവെച്ച കുറിപ്പിൽ പറഞ്ഞു.

Sports176 days ago

ICC ചാമ്പ്യൻസ് ട്രോഫി: ഇന്ത്യൻ ടീമിനെ പാകിസ്ഥാനിലേക്ക് അയക്കില്ല

2025ൽ പാകിസ്ഥാനിൽ നടക്കുന്ന ചാമ്പ്യൻസ് ട്രോഫി മത്സരങ്ങൾക്കായി ഇന്ത്യൻ ടീമിനെ പാകിസ്ഥാനിലേക്ക് അയക്കില്ലെന്ന് BCCI. ഇന്ത്യയുടെ മത്സരങ്ങൾ ശ്രീലങ്കയിലോ ദുബായിലോ നടത്തണമെന്നാണ് BCCI യുടെ ആവശ്യം. അടുത്ത വർഷം ഫെബ്രുവരി - മാർച്ച് മാസങ്ങളിലായാണ് ചാമ്പ്യൻസ് ട്രോഫി ടൂർണമെന്റ് നടക്കുക. ഇന്ത്യയുടെ മത്സരങ്ങൾ എല്ലാം ലാഹോറിൽ നടത്താമെന്നും ആവശ്യത്തിന് സുരക്ഷ ഒരുക്കാമെന്നും പാകിസ്ഥാൻ ക്രിക്കറ്റ് ബോർഡ് അറിയിച്ചിരുന്നു. എന്നാൽ പാകിസ്ഥാനിലേക്ക് ടീമിനെ അയക്കില്ല എന്നാണ് BCCI വൃത്തങ്ങൾ വ്യക്തമാക്കുന്നത്.

Sports166 days ago

ഗൗതം ഗംഭീര്‍ ഇന്ത്യന്‍ ക്രിക്കറ്റ് ടീമിന്റെ പരിശീലകന്‍

ഇന്ത്യന്‍ ക്രിക്കറ്റ് ടീമിന്റെ പുതിയ പരിശീലകനായി ഗൗതം ഗംഭീറിനെ നിയമിച്ചു. BCCI സെക്രട്ടറി ജയ് ഷാ എക്‌സിലൂടെയാണ് ഇക്കാര്യം അറിയിച്ചത്. ഇന്ത്യന്‍ ക്രിക്കറ്റിനെ മുന്നോട്ട് നയിക്കാന്‍ ഏറ്റവും അനുയോജ്യന്‍ ഗംഭീറാണെന്ന് സെക്രട്ടറി വ്യക്തമാക്കി. ട്വന്റി-20 ലോകകപ്പിന് ശേഷം രാഹുല്‍ ദ്രാവിഡ് സ്ഥാനം ഒഴിയുന്ന സാഹചര്യത്തിലാണ് പുതിയ കോച്ചിനെ തിരഞ്ഞെടുത്തത്.

Sports167 days ago

ലോകചാമ്പ്യന്മാർക്ക് മുംബൈയിൽ ഗംഭീര വരവേൽപ്പ്

മുംബൈ മറൈൻഡ്രൈവിനെ നീലക്കടലായി മാറ്റി ടി20 ലോകകപ്പ് നേടിയുള്ള ഇന്ത്യൻ ടീമിൻ്റെ വരവ്. മുംബൈ വിമാനത്താവളത്തിൽ എത്തിയ ഇന്ത്യൻ ടീമിനെ വലിയ ആഹ്ലാദത്തോടെയാണ് ആരാധകർ വരവേറ്റത്. മുംബൈ മറൈൻഡ്രൈവിൽ നിന്നും ഓപ്പൺ ബസിൽ കയറി വാങ്കഡെ സ്റ്റേഡിയം വരെയുള്ള വിക്ടറി പരേഡ് കാണാൻ പതിനായിരക്കണക്കിന് ആരാധകരാണ് ഒത്തുകൂടിയിരിക്കുന്നത്. ആരാധകരെ ആവേശത്തിലാഴ്ത്തി താരങ്ങൾ ട്രോഫി ഉയർത്തിക്കാട്ടുകയും കൈവീശുകയും ചെയ്തു. ടി20 ലോകകപ്പ് കിരീടം നേടിയെത്തുന്ന ടീമിനെ കാണുന്നതിനായി മഴ പോലും വകവെയ്ക്കാതെയാണ് ആരാധകർ എത്തിയത്.

Sports172 days ago

ലോകകപ്പ് കിരീടവുമായി ഇന്ത്യന്‍ ക്രിക്കറ്റ് ടീം ഇന്നെത്തും

ഇന്ന് രാവിലെ 6.20ന് ഡല്‍ഹി വിമാനത്താവളത്തിലെത്തുന്ന ബോയിംഗ് 777 വിമാനത്തിലാണ് ക്യാപ്റ്റന്‍ രോഹിത് ശര്‍മയുടെ നേതൃത്വത്തില്‍ ഇന്ത്യന്‍ ടീം അംഗങ്ങള്‍ എത്തുക. പ്രധാനമന്ത്രിയുമായുള്ള പ്രഭാത ഭക്ഷത്തില്‍ പങ്കെടുത്തശേഷം ഇന്ത്യന്‍ ക്രിക്കറ്റ് ടീം വൈകിട്ട് മുംബൈയില്‍ തുറന്ന ബസില്‍ വിക്ടറി പരേഡ് നടത്തും. മുംബൈ മറൈന്‍ ഡ്രൈവില്‍ നിന്ന് വാംഖഡെ സ്റ്റേഡിയം വരെ തുറന്ന ബസില്‍ കീരീടവുമായി യാത്ര ചെയ്യും.

Sports173 days ago

ലോക ചാമ്പ്യന്മാരായ ഇന്ത്യന്‍ ടീം നാളെ മടങ്ങും

ചുഴലിക്കാറ്റ് ഭീഷണി മുന്നറിയിപ്പിനെ തുടര്‍ന്നു വെസ്റ്റ് ഇന്‍ഡീസില്‍ കുടുങ്ങിക്കിടക്കുന്ന ഇന്ത്യന്‍ ടീമിനെ തിരികെ എത്തിക്കാനായി BCCI പ്രത്യേക വിമാനം ഏര്‍പ്പെടുത്തും. നാളെ ബാര്‍ബഡോസ് സമയം വൈകീട്ട് 6.00 മണിക്ക് ഇന്ത്യന്‍ ടീം നാട്ടിലേക്ക് തിരിക്കുമെന്നാണ് റിപ്പോര്‍ട്ട്. ബാര്‍ബഡോസില്‍ ചുലിക്കാറ്റ് മുന്നറിയിപ്പുണ്ടായതിനെ തുടര്‍ന്നു വിമാനങ്ങള്‍ റദ്ദാക്കിയതിനാലാണ്‌ ടീമിന്റെ ഇന്ത്യയിലേക്കുള്ള യാത്ര മുടങ്ങിയത്. നിലവില്‍ ബാര്‍ബഡോസിലെ ഹോട്ടലിലാണ് ടീം അംഗങ്ങള്‍ ഉള്ളത്.

National175 days ago

ടി20യില്‍ നിന്ന് വിരമിക്കല്‍ പ്രഖ്യാപിച്ച് രോഹിത് ശര്‍മയും കോഹ്‌ലിയും

ട്വന്റി 20 ലോകകപ്പില്‍ ഇന്ത്യയ്ക്കായി രണ്ടാം കിരീടം ഏറ്റുവാങ്ങിയതിന് ശേഷമാണ് ഇരുവരും വിരമിക്കല്‍ പ്രഖ്യാപിച്ചത്. 59 പന്തില്‍ കോഹ്‌ലി നേടിയ 76 റണ്‍സാണ് ഇന്ത്യയുടെ കിരീട വിജയത്തിന് അടിത്തറയിട്ടത്. ക്യാപ്റ്റനായി ലോകകപ്പ് ഉയര്‍ത്തി ശേഷമാണ് രോഹിത്തിന്റെ പടിയിറക്കം. എട്ട് മത്സരങ്ങളില്‍ 257 റണ്‍സുമായി റണ്‍വേട്ടക്കാരില്‍ രണ്ടാം സ്ഥാനത്താണ് രോഹിത്.

Sports177 days ago

ICC ടി20 ലോകകിരീടം ഇന്ത്യയ്ക്ക്

ദക്ഷിണാഫ്രിക്കയെ പരാജയപ്പെടുത്തി ടി20 ലോകകിരീടത്തിൽ മുത്തമിട്ട് ഇന്ത്യ. ഇന്ത്യ ഉയർത്തിയ 177 റൺസ് എന്ന വിജയലക്ഷ്യം പിന്തുടർന്ന ദക്ഷിണാഫ്രിക്കയ്ക്ക് ഏഴ് വിക്കറ്റ് നഷ്ടത്തിൽ 169 റൺസ് എടുക്കാനെ സാധിച്ചുള്ളൂ. ബുംറ എറിഞ്ഞ 16,18 ഓവറുകൾ കളിയിൽ നിർണായകമായി. ഹർദിക് പാണ്ഡ്യയുടെ അവസാന ഓവറിൽ ഡേവിഡ് മില്ലർ പുറത്തായതോടെ കളി ഇന്ത്യയുടെ വരുതിയിലായി. ഇന്ത്യയുടെ രണ്ടാം ടി20 ലോക കിരീടമാണിത്.

Sports177 days ago

ടി20 ലോകകപ്പ് ഫൈനൽ: ദക്ഷിണാഫ്രിക്കയ്ക്ക് 177 റൺസ് വിജയലക്ഷ്യം

ടി20 ലോകകപ്പ് ഫൈനലിൽ ഇന്ത്യക്കെതിരെ ദക്ഷിണാഫ്രിക്കയ്ക്ക് 177 റൺസ് വിജയലക്ഷ്യം. നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ 176 റൺസാണ് ഇന്ത്യ നേടിയത്. തുടക്കത്തിൽ തകർന്ന ബാറ്റിംഗ് നിരയെ വിരാട് കോഹ്ലിയും അക്ഷർ പട്ടേലും ചേർന്നാണ് കരകയറ്റിയത്. കോഹ്ലി അർധ സെഞ്ച്വറി തികച്ചു. 59 പന്തിൽ നിന്ന് 76 റൺസാണ് കോഹ്ലി നേടിയത്. 16 പന്തിൽ നിന്ന് 27 റൺസ് നേടി ശിവം ദുബെയും മികച്ച പ്രകടനം പുറത്തെടുത്തു.

Sports177 days ago

റെക്കോർഡ് നേട്ടത്തിന് അരികെ ഇന്ത്യൻ പേസർ അർഷ്ദീപ് സിങ്

ഒരു ടി20 ലോകകപ്പ് എഡിഷനിൽ ഏറ്റവും കൂടുതൽ വിക്കറ്റുകൾ വീഴ്ത്തുന്ന ബൗളർ എന്ന റെക്കോർഡിന് അരികിലാണ് ഇന്ത്യൻ പേസർ അർഷ്ദീപ് സിങ്. ഇന്നത്തെ മത്സരത്തിൽ മൂന്ന് വിക്കറ്റുകൾ വീഴ്ത്തിയാൽ അർഷ്‌ദീപിന് ഈ നേട്ടം സ്വന്തമാക്കാം. ഈ ലോകകപ്പിൽ 17 വിക്കറ്റുകൾ നേടിയ അഫ്ഗാനിസ്ഥാൻ പേസർ ഫസൽഹഖ് ഫാറൂഖി ആണ് നിലവിൽ ഒരു ലോകകപ്പ് എഡിഷനിൽ ഏറ്റവും കൂടുതൽ വിക്കറ്റുകൾ നേടിയ ബൗളർ എന്ന റെക്കോർഡിന് ഉടമ.

Sports177 days ago

കിരീടം ആര്‍ക്ക്; ട്വിന്റി 20 ലോകകപ്പ് ഫൈനല്‍ ഇന്ന്

ടി20 ലോകകപ്പില്‍ ഇന്ന് ഇന്ത്യ - ദക്ഷിണാഫ്രിക്ക ഫൈനല്‍ പോരാട്ടം. ഇന്ത്യന്‍ സമയം രാത്രി എട്ടിന് വെസ്റ്റിന്‍ഡീസിലെ ബാര്‍ബഡോസിലെ കെന്‍സിങ്ടണ്‍ ഓവലിലാണ് കിരീടപ്പോരാട്ടം നടക്കുക. നിലവിലെ ജേതാക്കളായ ഇംഗ്ലണ്ടിനെ തോല്‍പ്പിച്ച് ഇന്ത്യ ഫൈനലില്‍ എത്തിയപ്പോള്‍ അഫ്ഗാനിസ്ഥാനെ പരാജയപ്പെടുത്തിയാണ് ദക്ഷിണാഫ്രിക്ക ആദ്യമായി ഫൈനലില്‍ എത്തിയിരിക്കുന്നത്. അതേസമയം ഫൈനലില്‍ സഞ്ജു സാംസണ് അവസരം ലഭിക്കുമോ എന്നാണ് മലയാളി ആരാധകര്‍ ഉറ്റുനോക്കുന്നത്.

Sports178 days ago