UPI ലൈറ്റ് വാലറ്റ് പരിഷ്‌കരിച്ച് RBI

ബാലന്‍സ് നിശ്ചിത പരിധിയില്‍ താഴെ പോവുകയാണെങ്കില്‍ ഓട്ടോമാറ്റിക്കായി പണം വരവുവെച്ച് UPI ലൈറ്റില്‍ പണം നിറയ്ക്കാനുള്ള സൗകര്യമാണ് RBI ഏര്‍പ്പെടുത്തിയിരിക്കുന്നത്. UPI ലൈറ്റില്‍ ബാലന്‍സ് നിശ്ചയിക്കാന്‍ ഉപഭോക്താവിന് സൗകര്യം ഏര്‍പ്പെടുത്തിയിട്ടുണ്ട്. ഉപയോക്താക്കള്‍ക്ക് മെച്ചപ്പെട്ട സേവനം നല്‍കുന്നതിനും UPI ലൈറ്റ് കൂടുതല്‍ ആളുകളിലേക്ക് എത്തിക്കുന്നതിനും വേണ്ടിയാണ് പുതിയ സംവിധാനം കൊണ്ടുവന്നതെന്ന് RBI അറിയിച്ചു. ഇ-മാന്‍ഡേറ്റ് ചട്ടക്കൂടിന് കീഴില്‍ കൊണ്ടുവന്നാണ് പുതിയ സംവിധാനം അവതരിപ്പിച്ചത്.

Business199 days ago

75 ശതമാനം ഉപയോക്താക്കളും UPI ഉപേക്ഷിക്കുമെന്ന് സര്‍വേ

സര്‍വീസ് ചാര്‍ജ് ഈടാക്കാന്‍ തുടങ്ങിയാല്‍ 75 ശതമാനം ഉപയോക്താക്കളും UPI ഉപേക്ഷിക്കുമെന്ന് സര്‍വെ. ഉപയോക്താക്കള്‍ സര്‍വീസ് ചാര്‍ജ് ഈടാക്കുന്നതിന് എതിരാണെന്നാണ് ലോക്കല്‍ സര്‍ക്കിള്‍സിന്റെ സര്‍വേയില്‍ പറയുന്നത്. സര്‍വേയില്‍ പങ്കെടുത്ത 22 ശതമാനം UPI ഉപയോക്താക്കള്‍ മാത്രമാണ് സേവനത്തിന് ട്രാന്‍സാക്ഷന്‍ ഫീസ് ഏര്‍പ്പെടുത്തിയാല്‍ വഹിക്കാന്‍ തയ്യാറായിട്ടുള്ളത്. 38 ശതമാനം ഉപയോക്താക്കളും തങ്ങളുടെ പേയ്‌മെന്റ് ഇടപാടുകളുടെ 50 ശതമാനത്തിലധികവും UPI വഴിയാണ് നടത്തുന്നത്.

Business91 days ago

LGBTQ വ്യക്തികള്‍ക്ക് ഇനി ജോയിന്റ് ബാങ്ക് അക്കൗണ്ടുകള്‍ തുറക്കാം

LGBTQ കമ്മ്യൂണിറ്റിയില്‍ ഉള്‍പ്പെട്ട ആളുകള്‍ക്ക് ജോയിന്റ് ബാങ്ക് അക്കൗണ്ട് തുറക്കുന്നതിന് ഇനി മുതല്‍ നിയന്ത്രണങ്ങളൊന്നുമില്ലെന്ന് ധനമന്ത്രാലയം അറിയിച്ചു. അക്കൗണ്ട് ഉടമ മരണപ്പെടുന്ന സാഹചര്യത്തില്‍ അക്കൗണ്ടിലെ ബാക്കി തുക സ്വീകരിക്കുന്നതിന് ക്വിയര്‍ റിലേഷന്‍ഷിപ്പിലുള്ള വ്യക്തിയെ നാമനിര്‍ദ്ദേശം ചെയ്യുന്നതിനും നിയന്ത്രണമുണ്ടാകില്ല. എല്ലാ വാണിജ്യ ബാങ്കുകള്‍ക്കും റിസര്‍വ് ബാങ്ക് ഓഫ് ഇന്ത്യ ഇതുമായി ബന്ധപ്പെട്ട് വ്യക്തത നല്‍കിയിട്ടുണ്ടെന്നും ധനമന്ത്രാലയം അറിയിച്ചു.

National115 days ago

കോളേജ് വിദ്യാര്‍ത്ഥികള്‍ക്ക് ക്വിസ് മത്സരവുമായി RBI ; സമ്മാനമായി 10 ലക്ഷം രൂപ നേടാം

ബിരുദതലത്തിലുള്ള കോളേജ് വിദ്യാര്‍ത്ഥികള്‍ക്കായാണ് RBI ക്വിസ് മത്സരം സംഘടിപ്പിക്കുന്നത്. RBIയുടെ 90ാം വാര്‍ഷികാഘോഷത്തിന്റെ ഭാഗമായി ദേശീയ തലത്തില്‍ നടക്കുന്ന മത്സരമാണിത്. പൊതുവിജ്ഞാനവുമായി ബന്ധപ്പെട്ട ചോദ്യങ്ങള്‍ ആയിരിക്കും മത്സരത്തില്‍ ഉണ്ടാകുക. ജില്ലാതലത്തിലും സംസ്ഥാനതലത്തിലും പിന്നീട് ദേശീയ തലത്തിലും മത്സരങ്ങള്‍ നടക്കും. ഓണ്‍ലൈനായാണ് മത്സരങ്ങള്‍ നടക്കുക.

National124 days ago

UPI വഴി 5 ലക്ഷം വരെ നികുതി അടയ്ക്കാം; പുത്തന്‍ മാറ്റങ്ങളുമായി റിസര്‍വ് ബാങ്ക്

രാജ്യത്ത് ഏറ്റവും കൂടുതല്‍ ആളുകള്‍ പണമിടപാടിന് ഉപയോഗിക്കുന്ന UPI (യൂണിഫൈഡ് പേയ്‌മെന്റ്‌സ് ഇന്റര്‍ഫേസ്) സംവിധാനത്തില്‍ ശ്രദ്ധേയമായ മാറ്റങ്ങള്‍ കൊണ്ടുവന്ന് റിസര്‍വ് ബാങ്ക്. UPI വഴി നികുതിയടക്കാനുള്ള പരിധി ഒരുലക്ഷത്തില്‍ നിന്ന് അഞ്ച് ലക്ഷമാക്കി ഉയര്‍ത്തി. അതേസമയം സാധാരണ UPI ഇടപാടുകളുടെ പരിധി ഒരു ലക്ഷമായി തന്നെ തുടരും. കൂടാതെ മറ്റൊരാളുടെ അക്കൗണ്ട് അദ്ദേഹത്തിന്റെ അനുമതിയോടെ UPIയുമായി ബന്ധിപ്പിക്കുന്ന ഡെലിഗേറ്റഡ് പേമെന്റ് സംവിധാനം നടപ്പാക്കുമെന്നും റിസര്‍വ് ബാങ്ക് ഗവര്‍ണര്‍ ശക്തികാന്ത ദാസ് അറിയിച്ചു. നിലവില്‍ സ്വന്തം അക്കൗണ്ട് മാത്രമാണ് UPIയുമായി ബന്ധപ്പെടുത്താന്‍ കഴിയുക.

National137 days ago

ആശ്വാസം; റിപ്പോ നിരക്കില്‍ മാറ്റം വരുത്താതെ റിസര്‍വ് ബാങ്ക്

റിസര്‍വ് ബാങ്ക് ഓഫ് ഇന്ത്യയുടെ മോണിറ്ററി പോളിസി കമ്മിറ്റിയാണ് റിപ്പോ നിരക്ക് 6.5% ആയി തുടരാന്‍ തീരുമാനിച്ചത്. ആറംഗ കമ്മിറ്റിയില്‍ നാല് പേരും തീരുമാനത്തെ അനുകൂലിച്ച് വോട്ടു ചെയ്തു. വാണിജ്യ ബാങ്കുകള്‍ റിസര്‍വ് ബാങ്കില്‍ നിന്ന് വായ്പയെടുക്കുന്ന നിരക്കാണ് റിപ്പോ നിരക്ക്. റിപ്പോ നിരക്ക് വര്‍ധിച്ചാല്‍ ബാങ്കുകളില്‍ നിന്ന് ലഭിക്കുന്ന വായ്പകളുടെ പലിശ നിരക്ക് വര്‍ധിക്കും. തുടര്‍ച്ചയായ ഒന്‍പതാം തവണയാണ് റിപ്പോ നിരക്ക് മാറ്റമില്ലാതെ തുടരുന്നത്.

Business137 days ago

രാജ്യത്തെ UPI ഇടപാടുകളില്‍ 57 ശതമാനം വളര്‍ച്ച

UPI ഇടപാടുകളുടെ എണ്ണം 2019-20ലെ 12.5 ബില്യണില്‍ നിന്ന് 2023-24ല്‍ 131 ബില്യണായി ഉയര്‍ന്നു. ബോസ്റ്റണ്‍ കണ്‍സള്‍ട്ടിംഗ് ഗ്രൂപ്പ് (BCG) ബാങ്കിംഗ് സെക്ടര്‍ റൗണ്ടപ്പ് റിപ്പോര്‍ട്ടിലാണ് ഇക്കാര്യം വ്യക്തമാക്കിയിരിക്കുന്നത്. ഫോണ്‍ പേ, ഗൂഗിള്‍ പേ എന്നിവയെയാണ് ആളുകള്‍ UPI ഇടപാടുകള്‍ക്കായി കൂടുതല്‍ ആശ്രയിക്കുന്നത്. കഴിഞ്ഞ മൂന്ന് വര്‍ഷത്തിനുള്ളില്‍ ക്രെഡിറ്റ് കാര്‍ഡ് ഇടപാടുകള്‍ ഇരട്ടിയായതായും റിപ്പോര്‍ട്ടില്‍ പറയുന്നു.

Business147 days ago

ഇന്ത്യയിലെത്തുന്ന വിദേശ സഞ്ചാരികള്‍ക്കും ഇനി UPI ഇടപാട് നടത്താം

ഇന്ത്യയിലെത്തുന്ന സഞ്ചാരികള്‍ക്ക് പണമിടപാട് നടത്താനായി വണ്‍ വേള്‍ഡ് UPI ആപ്പാണ് നാഷണല്‍ പേയ്‌മെന്റ്‌സ് കോര്‍പ്പറേഷന്‍ ഓഫ് ഇന്ത്യ (NPCI) അവതരിപ്പിച്ചിരിക്കുന്നത്. ഇന്ത്യന്‍ സിം കാര്‍ഡും ഇന്ത്യന്‍ ബാങ്ക് അക്കൗണ്ടും ഇല്ലാതെ UPI പണമിടപാടുകള്‍ നടത്താന്‍ സഹായിക്കുന്ന ആപ്പാണിത്. പ്രീപെയ്ഡ് പേയ്‌മെന്റ് ഇന്‍സ്ട്രുമെന്റ് (PPI) എന്ന സാങ്കേതിക വിദ്യ ഉപയോഗിച്ചാണ് ഈ സംവിധാനം ഏര്‍പ്പെടുത്തിയിരിക്കുന്നത്. 2023 ല്‍ ജി20 ഇന്ത്യ ഉച്ചകോടിയില്‍ വണ്‍ വേള്‍ഡ് UPI ആപ്പ് പരിചയപ്പെടുത്തിയിരുന്നു.

National153 days ago

QR കോഡ് അധിഷ്ഠിത UPI പണമിടപാടുകള്‍ ഇനി UAEയിലും

മധ്യേഷ്യയിലും ആഫ്രിക്കയിലും ഡിജിറ്റല്‍ പണമിടപാട് സേവനങ്ങള്‍ എത്തിക്കുന്ന നെറ്റ് വര്‍ക്ക് ഇന്റര്‍നാഷണല്‍ എന്ന കമ്പനിയുമായി സഹകരിച്ചാണ് ഇത് സാധ്യമാക്കിയത്. NPCI ഇന്റര്‍നാഷണല്‍ പേമെന്റ്സ് ലിമിറ്റഡാണ് ഇക്കാര്യം അറിയിച്ചത്. രണ്ട് ലക്ഷത്തോളം POS ടെര്‍മിനലുകളില്‍ ഇനി UPI ഇടപാടുകള്‍ നടത്താനാവും. ഇതുവഴി ഇന്ത്യന്‍ വിനോദ സഞ്ചാരികള്‍ക്കും പ്രവാസികള്‍ക്കും UAEയില്‍ QR കോഡ് സ്‌കാന്‍ ചെയ്ത് പണം നല്‍കാനാവും.

Business172 days ago

സര്‍ക്കാര്‍ ഓഫീസുകളില്‍ ഇനി UPI സൗകര്യം ലഭ്യമാകും

സര്‍ക്കാര്‍ ഓഫീസുകളില്‍ ഇനി UPI വഴി പണം നല്‍കാനാവും. ഗൂഗിള്‍ പേ, ഫോണ്‍ പേ പോലുള്ള UPI മാര്‍ഗങ്ങളിലൂടെ സര്‍ക്കാര്‍ വകുപ്പുകള്‍ക്ക് ജനങ്ങളില്‍ നിന്ന് പണം സ്വീകരിക്കാമെന്നാണ് ധനമന്ത്രാലയത്തിന്റെ ഉത്തരവില്‍ പറയുന്നത്. ഇതിനായി സര്‍ക്കാര്‍ ഓഫീസുകളില്‍ ക്യു ആര്‍ കോഡ് പ്രദര്‍ശിപ്പിക്കും. സ്വീകരിക്കുന്ന പണം ട്രഷറിയില്‍ എത്തിക്കാനുള്ള സാങ്കേതിക ക്രമീകരണം അതത് വകുപ്പുകളാണ് ഒരുക്കേണ്ടത്.

Kerala173 days ago

രാജ്യത്തുടനീളമുള്ള ബാങ്കുകള്‍ക്ക് സൈബര്‍ ആക്രമണ മുന്നറിയിപ്പുമായി RBI

ഇന്റലിജന്‍സ് റിപ്പോര്‍ട്ടുകളുടെ അടിസ്ഥാനത്തിലാണ് ബാങ്കുകള്‍ക്ക് സൈബര്‍ ആക്രമണ മുന്നറിയിപ്പ് നല്‍കിയിരിക്കുന്നത്. അപകടം ഒഴിവാക്കുന്നതിനായി സജീവമായ സംവിധാനങ്ങളെല്ലാം നിരീക്ഷിക്കാനും നിര്‍ദേശം നല്‍കിയിട്ടുണ്ട്. നിരവധി സൈബര്‍ ആക്രമണങ്ങള്‍ക്ക് പേരുകേട്ട ലുല്‍സെക് ഗ്രൂപ്പാണ് ഇന്ത്യന്‍ ബാങ്കുകളെ ലക്ഷ്യമിടുന്നതെന്നാണ് RBI പറയുന്നത്.

Business176 days ago