രാത്രി ഉപഭോഗം കൂടുന്ന സമയത്തെ വൈദ്യുതി നിരക്ക് കൂട്ടാന്‍ ആലോചന: മന്ത്രി കെ. കൃഷ്ണന്‍കുട്ടി
പകല്‍ സമയത്തെ വൈദ്യുതി ഉപഭോഗത്തിന് മാത്രമായി വൈദ്യുതി നിരക്ക് കുറയ്ക്കാനും രാത്രിയില്‍ വൈദ്യുതി ഉപഭോഗം കൂടുന്ന സമയത്തെ നിരക്ക് വര്‍ധിപ്പിക്കാനും ആലോചിക്കുന്നുണ്ടെന്ന് വൈദ്യുതി മന്ത്രി കെ. കൃഷ്ണന്‍കുട്ടി പറഞ്ഞു. ഭൂരിഭാഗം വീടുകളിലും സ്മാര്‍ട്ട് മീറ്ററുകള്‍ സ്ഥാപിച്ചു കഴിഞ്ഞുവെന്നും ഇതിനാല്‍ തന്നെ ഓരോ സമയത്തെയും വൈദ്യുതി ഉപഭോഗം കണക്കാന്‍ സാധിക്കുമെന്നും അദ്ദേഹം കൂട്ടിച്ചേര്‍ത്തു. രാത്രിയിലാണ് ഏറ്റവും കൂടുതല്‍ വൈദ്യുതി ഉപഭോഗം ഉണ്ടാകുന്നതെന്നും അദ്ദേഹം വ്യക്തമാക്കി.
Related News
വൈദ്യുതി നിരക്ക്: റെഗുലേറ്ററി കമ്മീഷന്റെ പൊതുതെളിവെടുപ്പ് സെപ്റ്റംബർ അഞ്ചിന്
വൈദ്യുതി നിരക്ക് പരിഷ്കരിക്കുന്നതുമായി ബന്ധപ്പെട്ട് വൈദ്യുതി ബോർഡ് സമർപ്പിച്ചിട്ടുള്ള നിർദേശങ്ങളിൽ പൊതുജനങ്ങളുടെ അഭിപ്രായം രേഖപ്പെടുത്തുന്നതിന് വേണ്ടി സെപ്റ്റംബർ അഞ്ചിന് വൈദ്യുതി റെഗുലേറ്ററി കമ്മീഷൻ തെളിവെടുപ്പ് നടത്തും. രാവിലെ 10:30 മുതൽ എറണാകുളം കോർപറേഷൻ ടൗൺഹാളിൽ വെച്ചാണ് വൈദ്യുതി റെഗുലേറ്ററി കമ്മീഷന്റെ തെളിവെടുപ്പ്. കൂടാതെ തപാൽ മുഖേനയും [email protected] എന്ന ഈ-മെയിലിലേക്കും അഭിപ്രായങ്ങൾ അറിയിക്കാം.
സംസ്ഥാനത്ത് അപ്രഖ്യാപിത പവര്‍കട്ടില്ലെന്ന് മന്ത്രി കെ. കൃഷ്ണന്‍കുട്ടി
കേന്ദ്ര വിഹിതത്തിന്റെ ലഭ്യതക്കുറവ് അനുസരിച്ച് ചില നിയന്ത്രണങ്ങള്‍ ഏര്‍പ്പെടുത്തിയതാണെന്നും നിലവില്‍ വൈദ്യുതി പ്രതിസന്ധിയില്ലെന്നും മന്ത്രി കെ. കൃഷ്ണന്‍കുട്ടി വ്യക്തമാക്കി. ആശങ്കപ്പെടേണ്ട സാഹചര്യമില്ലെന്നും മന്ത്രി പറഞ്ഞു. സംസ്ഥാനത്ത് വൈദ്യുതി ആവശ്യകതയില്‍ വന്ന വര്‍ധനവും പവര്‍ എക്സ്ചേഞ്ച് മാര്‍ക്കറ്റിലെ വൈദ്യുതി ലഭ്യതക്കുറവും കാരണം കഴിഞ്ഞ ദിവസം വൈദ്യുതി നിയന്ത്രണം ആവശ്യമായി വരുമെന്ന് KSEB അറിയിപ്പ് നല്‍കിയിരുന്നു.
വയനാട്ടിലെ ദുരന്തമേഖലയിൽ രണ്ടു മാസത്തേക്ക് സൗജന്യ വൈദ്യുതി
വയനാട്ടിൽ ഉരുൾപൊട്ടൽ ഉണ്ടായ ദുരന്ത മേഖലയിലെ ഉപഭോക്താക്കളിൽ നിന്നും രണ്ടു മാസത്തേക്ക് വൈദ്യുതി നിരക്ക് ഈടാക്കില്ലെന്ന് വൈദ്യുതി മന്ത്രി കെ. കൃഷ്ണൻകുട്ടി. ഇതു സംബന്ധിച്ച് ബന്ധപ്പെട്ട ഉദ്യോഗസ്ഥർക്ക് നിർദ്ദേശം നൽകിയിട്ടുണ്ടെന്നും നിലവിൽ ഉപഭോക്താക്കൾക്ക് വൈദ്യുതി ചാർജ് കുടിശ്ശിക ഉണ്ടെങ്കിൽ അത് ഈടാക്കരുതെന്നും അറിയിച്ചിട്ടുണ്ടെന്നും മന്ത്രി പറഞ്ഞു. മേപ്പാടി പഞ്ചായത്തിലെ 10, 11, 12 വാർഡുകളില്‍ ഉള്‍പ്പെടുന്ന KSEB യുടെ ചൂരല്‍മല എക്സ്ചേഞ്ച്, ചൂരല്‍മല ടവർ, മുണ്ടക്കൈ, കെ.കെ. നായർ, അംബേദ്കർ കോളനി, അട്ടമല, അട്ടമല പമ്പ് എന്നീ ട്രാൻസ്ഫോർമറുകളില്‍ ഉള്‍പ്പെടുന്ന ഉപഭോക്താക്കള്‍ക്കാണ് അടുത്ത രണ്ടു മാസം സൗജന്യ വൈദ്യുതി ലഭിക്കുക.
വൈദ്യുതി കമ്പി പൊട്ടിവീണ് മരിച്ച സുധന്റെ കുടുംബത്തിന് 10 ലക്ഷം ധനസഹായം പ്രഖ്യാപിച്ചു
വയനാട്ടില്‍ വൈദ്യുതി കമ്പി പൊട്ടിവീണ് മരിച്ച സുധന്റെ കുടുംബത്തിന് പത്ത് ലക്ഷം രൂപ ധനസഹായം നല്‍കുമെന്ന് മന്ത്രി കെ. കൃഷ്ണന്‍ കുട്ടി പറഞ്ഞു. ആദ്യഘഡുവായി അഞ്ച് ലക്ഷം രൂപ ഉടന്‍ തന്നെ കൈമാറും. രേഖകള്‍ ഹാജരാക്കിയാല്‍ രണ്ടാം ഘഡു കൈമാറുമെന്ന് മന്ത്രി വ്യക്തമാക്കി. വയനാട് പുല്‍പ്പള്ളിയില്‍ ചീയമ്പം 73 കോളനിയിലെ സുധന്‍ (32) ഇന്നലെയാണ് പൊട്ടിവീണ വൈദ്യുത ലൈനില്‍ നിന്ന് ഷോക്കേറ്റ് മരിച്ചത്.
സംസ്ഥാനത്ത് നിലവിലെ വൈദ്യുതി നിരക്ക് മൂന്ന് മാസം കൂടി തുടരും
2023 നവംബറില്‍ നിലവില്‍ വന്ന നിരക്കുകള്‍ സെപ്റ്റംബര്‍ 30 വരെ തുടരാനാണ് റെഗുലേറ്ററി കമ്മീഷന്റെ തീരുമാനം. നിലവിലെ നിരക്കിന്റെ കാലാവധി ഈ മാസം 30 ന് അവസാനിക്കാനിരിക്കെയാണ് പുതിയ ഉത്തരവ് പുറത്തിറക്കിയത്. പ്രതിമാസ ബില്ലില്‍ യൂണിറ്റിന് ഒമ്പത് പൈസ നിരക്കില്‍ മൂന്ന് മാസത്തേക്ക് കൂടി ഇന്ധന സര്‍ചാര്‍ജ് ഈടാക്കാനും KSEBയ്ക്ക് അനുമതി നല്‍കി.
